دفاعی معاہدہ ایک رات میں نہیں ہوا، کئی ماہ کی محنت کا نتیجہ ہے ،اسحاق ڈار

نائب وزیر اعظم اور وزیر خارجہ اسحاق  ڈار نے کہاہے کہ پاکستان اور سعودی عرب کے درمیان حالیہ دفاعی معاہدہ اچانک یا راتوں رات نہیں ہوا بلکہ اس پر کئی ماہ تک کام ہوا۔

لندن میں میڈیا سے گفتگو کرتے ہوئے انہوں نے واضح کیا کہ پاکستان اور سعودی عرب کے درمیان ہمیشہ قریبی اور اسٹریٹجک تعلقات رہے ہیں، اور یہ نیا معاہدہ ان تعلقات کو مزید مضبوط کرنے کی ایک اہم کڑی ہے۔

اسحاق ڈار کا کہنا تھا کہ دونوں ممالک نے اس معاہدے پر باہمی رضامندی اور مکمل اعتماد کے ساتھ دستخط کیے ہیں، اور یہ قدم نہ صرف دوطرفہ سلامتی کے لیے اہم ہے بلکہ خطے میں امن و استحکام کے لیے بھی ایک مثبت پیش رفت ہے۔
دیگر ممالک کی اس معاہدے میں شمولیت سے متعلق سوال پر انہوں نے کہا کہ اس بارے میں فی الحال کچھ کہنا قبل از وقت ہوگا، البتہ کچھ ممالک نے دلچسپی ضرور ظاہر کی ہے۔
انہوں نے سعودی عرب کا شکریہ ادا کرتے ہوئے کہا کہ ماضی میں جب بھی پاکستان کو مشکلات کا سامنا ہوا، سعودی عرب نے ہمیشہ بھرپور ساتھ دیا۔ چاہے وہ معاشی بحران ہو یا آئی ایم ایف سے معاملات — سعودی حکومت نے پاکستان کی مدد کی اور ہمارے ساتھ کھڑی رہی۔
 واضح رہے کہ 18 ستمبر کو وزیراعظم شہباز شریف کے دورۂ سعودی عرب کے دوران ریاض میں سعودی ولی عہد محمد بن سلمان اور وزیراعظم شہباز شریف نے “اسٹریٹجک باہمی دفاعی معاہدے” پر دستخط کیے۔
 اس معاہدے کے تحت اگر کسی ایک ملک پر جارحیت کی جاتی ہے تو اسے دونوں ممالک کے خلاف حملہ تصور کیا جائے گا۔ معاہدہ دفاعی تعاون، باہمی تحفظ، اور خطے میں امن و سلامتی کے لیے مشترکہ عزم کا اظہار ہے۔