ننکانہ صاحب، واربرٹن میں آلودگی پھیلانے والا بھٹہ خشت مسمار

ننکانہ صاحب (نیوزڈیسک)وزیر اعلیٰ پنجاب مریم نواز شریف کی ہدایت پر ضلع ننکانہ صاحب کے علاقے واربرٹن میں ماحولیاتی آلودگی کے خلاف بڑی کارروائی عمل میں لائی گئی۔ ڈپٹی کمشنر ننکانہ محمد تسلیم اختر راؤ کی نگرانی میں محکمہ ماحولیات نے زگ زیگ ٹیکنالوجی استعمال نہ کرنے والے بھٹے کو مسمار کر دیا۔ کارروائی آلودگی پھیلانے اور سموگ کا باعث بننے والے بھٹے کے خلاف کی گئی۔

ڈپٹی کمشنر تسلیم اختر راؤ کا کہنا ہے کہ ماحول میں بگاڑ پیدا کرنے والے عناصر کے خلاف سخت کریک ڈاؤن جاری ہے اور متعلقہ ادارے روزانہ کی بنیاد پر انڈسٹریل یونٹس اور بھٹہ جات کی جانچ پڑتال کر رہے ہیں۔ ان کا کہنا تھا کہ ماحولیاتی تحفظ کے لیے تمام دستیاب وسائل بروئے کار لائے جا رہے ہیں اور حکومت پنجاب عوام کو بہتر اور صاف ماحول فراہم کرنے کے لیے عملی اقدامات کر رہی ہے۔

انہوں نے مزید بتایا کہ ضلعی انتظامیہ ماحول کو سازگار بنانے کے لیے گرینڈ شجرکاری مہم بھی جاری رکھے ہوئے ہے۔ ڈپٹی کمشنر کے مطابق صاف اور محفوظ ماحول کے قیام کے لیے شہریوں کا تعاون ناگزیر ہے، جبکہ ماحولیاتی قوانین کی خلاف ورزی کرنے والوں کے خلاف بلا امتیاز کارروائی جاری رکھی جائے گی۔