اتوار 12 اپریل 2026 
بالی ووڈ اداکار ابھیشیک بچن نے انکشاف کیا ہے کہ انہوں نے اپنے والد سپر اسٹار امیتابھ بچن(Abhishek Bachchan) کی کلاسک فلم دیوار سے ایک اہم سبق سیکھا، جس نے ان کے کاروباری فیصلوں کو متاثر کیا۔
ایک خصوصی انٹرویو میں ابھیشیک بچن نے بتایا کہ ’دیوار‘ کے ایک خاص منظر نے انہیں یہ سمجھایا کہ کاروبار صرف منافع یا اعداد و شمار کا کھیل نہیں بلکہ اس میں جذبات اور ذاتی وابستگی بھی اہم کردار ادا کرتی ہے۔ ان کے مطابق اگر کسی کام میں دل شامل نہ ہو تو اس کا کوئی فائدہ نہیں۔
اداکار نے کہا کہ یہی سوچ اب ان کے ہر فیصلے کا بنیادی حصہ بن چکی ہے، اور وہ کسی بھی سرمایہ کاری سے پہلے اس بات کو یقینی بناتے ہیں کہ وہ اس سے ذاتی طور پر جڑے ہوئے ہوں۔
انہوں نے جدید کاروباری ماڈلز میں اپنی دلچسپی کا ذکر کرتے ہوئے Swiggy اور Zepto جیسے اداروں کی تعریف کی۔ ان کا کہنا تھا کہ ان کمپنیوں کی سہولت نے ان کی روزمرہ زندگی کو آسان بنایا، جس کی وجہ سے وہ ان کے ساتھ بطور سرمایہ کار منسلک ہوئے۔
مزیدپڑھیں: ایشوریا رائے کیساتھ ریڈ کارپٹ پر جانا خوفناک لگتا ہے: ابھیشیک بچن
ابھیشیک بچن کے مطابق کسی بھی پروڈکٹ یا سروس سے ذاتی فائدہ اور اطمینان ہی سرمایہ کاری کا اصل محرک ہونا چاہیے، نہ کہ صرف مالی مفاد۔
پیشہ ورانہ محاذ پر اداکار اس وقت اپنی آنے والی بڑی فلموں ’راجہ شیواجی‘، ’کنگ‘ اور دھوم 4 کی تیاریوں میں مصروف ہیں، جن کا شائقین بے چینی سے انتظار کر رہے ہیں۔
