ہفتہ 9 مئی 2026 
آصف علی زرداری (Asif Ali Zardari) نے معرکۂ حق کی پہلی سالگرہ کے موقع پر اپنے پیغام میں کہا ہے کہ پاکستان آج خطے میں توازن اور استحکام کی ایک اہم علامت کے طور پر سامنے آیا ہے۔
ایوانِ صدر سے جاری بیان کے مطابق صدر نے کہا کہ شہباز شریف اور سید عاصم منیر کی قیادت اور کوششوں نے ملک کو موجودہ خطے کی صورتحال میں ایک مضبوط اور متوازن ریاست کے طور پر اجاگر کیا ہے۔
انہوں نے مسلح افواج کی کارکردگی کو سراہتے ہوئے کہا کہ معرکۂ حق میں پاکستان فضائیہ اور پاکستان بحریہ سمیت تمام فورسز نے غیر معمولی پیشہ ورانہ مہارت کا مظاہرہ کیا۔
صدر زرداری کے مطابق پاکستان ایک امن پسند اور ذمہ دار ریاست ہے جو ہر جارحیت کا جواب مؤثر مگر متوازن انداز میں دینے کی صلاحیت رکھتی ہے۔ انہوں نے کہا کہ ملک کی دفاعی صلاحیتوں نے دنیا کو واضح پیغام دیا ہے کہ پاکستان اپنی خودمختاری پر کوئی سمجھوتہ نہیں کرے گا۔
مزید پڑھیں؛مغربی کنارے میں کشیدگی: اسرائیلی آبادکاروں کی دھمکی پر فلسطینی خاندان مجبورِ نقلِ تدفین
انہوں نے مسئلہ کشمیر کو اقوام متحدہ کی قراردادوں کے مطابق حل کرنے پر زور دیتے ہوئے کہا کہ پاکستان کشمیری عوام کی سیاسی، اخلاقی اور سفارتی حمایت جاری رکھے گا۔
سندھ طاس معاہدے کے حوالے سے انہوں نے بھارت کے رویے پر تشویش ظاہر کرتے ہوئے اسے خطے کے لیے نقصان دہ قرار دیا اور پانی کو پاکستان کی زندگی سے جڑا بنیادی مسئلہ بتایا۔
صدر نے افغانستان سے بھی اپیل کی کہ اس کی سرزمین پاکستان یا کسی دوسرے ملک کے خلاف دہشت گردی کے لیے استعمال نہ ہونے دی جائے، جبکہ خطے میں پائیدار امن کے لیے دہشت گردی کے مکمل خاتمے کو ضروری قرار دیا۔
آخر میں انہوں نے کہا کہ پاکستان کی مسلح افواج اور عوام ہر چیلنج کا مقابلہ کرنے کے لیے متحد اور مکمل طور پر تیار ہیں۔
