بدھ 15 اکتوبر 2025 
پاکستان کی سکیورٹی فورسز نے دہشت گردی کے خلاف جنگ میں ایک بار پھر اپنی بھرپور صلاحیت کا مظاہرہ کیا ہے۔ پاک فوج نے مہمند میں بروقت اور موثر کارروائی کرتے ہوئے 30 خوارج کو ہلاک کر دیا۔ سکیورٹی ذرائع کے مطابق، پاک فوج کی سخت جوابی کارروائی نے افغان طالبان کو فتنہ الخوارج پر انحصار کرنے پر مجبور کر دیا ہے۔
پاک فوج نے مہمند میں افغان طالبان کی ایک بڑی تشکیل کو سرحدی علاقوں میں دراندازی کی کوشش کے دوران ناکام بنا دیا۔ ذرائع کے مطابق، اس تشکیل کا مقصد سرحدی علاقوں میں دہشت گردی پھیلانا تھا۔ سکیورٹی ذرائع نے بتایا کہ افغان طالبان نے اپنی اس ہزیمت کو چھپانے کی ناکام کوشش کی، لیکن پاک فوج کی چوکس کارروائی نے ان کے عزائم خاک میں ملا دیے۔
پاک فوج اور سکیورٹی فورسز ملک سے دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔ فوج کے ترجمان کے مطابق، یہ کارروائیاں اس عزم کا عملی ثبوت ہیں کہ پاکستان کی سرزمین کو دہشت گردی سے پاک کرنے کے لیے کوئی کسر اٹھا نہ رکھی جائے گی۔
