بدھ 19 اگست 2026 
ٹی وی میزبان اور اداکار ساحر لودھی (Sahir lodhi)کے خلاف چیک باؤنس ہونے کے معاملے پر کراچی پولیس نے عدالت کے حکم پر مقدمہ درج کرلیا۔
میڈیا رپورٹس کے مطابق کراچی کے شاہ لطیف ٹاؤن تھانے کے ایس ایچ او غلام نبی آفریدی نے بتایا کہ میزبان کی مبینہ کاروباری شراکت دار نغمہ گل نے 8 سے 9 چیک باؤنس ہونے کے معاملے پر عدالت سے رجوع کیا تھا۔
انہوں نے بتایا کہ عدالت کے حکم پر پولیس نے ساحر لودھی کے خلاف پاکستان پینل کوڈ کی دفعہ 489-ایف یعنی بدنیتی سے ایسا چیک جاری کرنا جس کی رقم ادا نہ ہوسکے اور دفعہ 34 کے تحت مقدمہ درج کیا ہے۔ پولیس کے مطابق اس معاملے میں تاحال کوئی گرفتاری عمل میں نہیں آئی۔
ایف آئی آر کے مطابق مدعیہ نے مؤقف اختیار کیا کہ وہ بیوہ اور لانڈھی کی رہائشی ہیں۔ ان کے مطابق ایک جاننے والے کے مشورے پر انہوں نے سرمایہ کاری کی غرض سے ساحر لودھی کو 40 لاکھ روپے دیے تھے۔
مدعیہ نے دعویٰ کیا کہ ساحر لودھی نے اس سرمایہ کاری پر انہیں ایک مرتبہ 2 لاکھ 50 ہزار روپے اور دوسری مرتبہ 4 لاکھ روپے منافع ادا کیا۔
مزیدپڑھیں:اوپن اے آئی نے نوجوانوں کے لیے زیادہ محفوظ چیٹ جی پی ٹی متعارف کرا دیا
ایف آئی آر میں مزید کہا گیا ہے کہ ساحر لودھی نے مختلف اوقات میں انہیں مزید 8 چیک دیے تاہم بینک اکاؤنٹ میں مطلوبہ رقم موجود نہ ہونے کے باعث تمام چیک باؤنس ہوگئے۔
مدعیہ کے مطابق چیکوں کی رقم ادا نہ ہونے پر انہوں نے قانونی کارروائی کے لیے ملیر کے ڈسٹرکٹ جج سے رجوع کیا جس کے بعد عدالت کی ہدایت پر پولیس نے ساحر لودھی کے خلاف مقدمہ درج کرلیا۔
پولیس کا کہنا ہے کہ معاملے کی مزید تفتیش جاری ہے اور مقدمے میں نامزد کسی شخص کو تاحال گرفتار نہیں کیا گیا۔
