بلوچستان اور پاکستان کا حال اور مستقبل ایک ہے، ہمیشہ ایک رہے گا، چیف آف ڈیفنس فورسز فیلڈ مارشل سید عاصم

چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر(Asim Munir) نے بلوچستان کی اہم شخصیات اور سیاسی قیادت سے ملاقات کی۔ ملاقات کے دوران فیلڈ مارشل سید عاصم منیر نے کہا کہ بلوچستان اور پاکستان کا حال اور مستقبل ایک ہے اور ہمیشہ ایک رہے گا۔ بلوچستان باصلاحیت، ثابت قدم، محب وطن اور باوقار عوام کی سرزمین ہے۔

آئی ایس پی آر کے مطابق آرمی چیف نے کہا کہ واضح قومی بیانیہ، پائیدار امن اور استحکام صوبے کی حقیقی معاشی صلاحیت سے فائدہ اٹھانے، سرمایہ کاری کو فروغ دینے اور بلوچستان کے وسیع انسانی و قدرتی وسائل کو عوام کی خوشحالی میں تبدیل کرنے کے لیے بنیادی اہمیت رکھتے ہیں۔

فیلڈ مارشل سید عاصم منیر نے کہا کہ بلوچستان کے نوجوانوں میں صلاحیت اور مواقع کی کوئی کمی نہیں، نوجوان معاشرے کا سب سے متحرک اور امید افزا طبقہ ہیں۔ نوجوانوں کو بااختیار بنانا اور انہیں ملکی ترقی میں کردار ادا کرنے کے مواقع فراہم کرنا پائیدار ترقی کے لیے ناگزیر ہے۔

آرمی چیف نے کہا کہ فتنۃ الخوارج اور فتنۃ الہندوستان دشمن عناصر کے لیے کام کرنے والے بیرونی سرپرستی یافتہ پراکسیز ہیں، جن کا مقصد بلوچستان میں عدم استحکام پیدا کرنا، ترقی کی راہ میں رکاوٹ ڈالنا اور ریاست و عوام کے درمیان خلیج پیدا کرنا ہے۔

انہوں نے کہا کہ ان مذموم عزائم کو قوم کے اجتماعی عزم اور ریاست کے غیر متزلزل، پُرعزم اور فیصلہ کن ردعمل کے ذریعے ناکام بنایا جائے گا۔

مزیدپڑھیں:گرمی میں کچھ عام ادویات جسم کو زیادہ متاثر کرسکتی ہیں، ماہرین کا انتباہ

فیلڈ مارشل سید عاصم منیر نے بلوچستان کی اہم شخصیات اور سماجی رہنماؤں کے امن کے فروغ، سماجی ہم آہنگی کے استحکام اور تعمیری قومی مکالمے کے لیے کردار کو سراہا۔ انہوں نے کہا کہ دشمن کے منفی پروپیگنڈے کا ہر سطح پر بلاجھجھک مقابلہ، جھوٹے بیانیوں کو بے نقاب اور بلوچستان اور اس کے عوام کی حقیقی صلاحیت، ترقی اور خواہشات کو اجاگر کرنا ضروری ہے۔

آرمی چیف نے واضح کیا کہ بلوچستان کی تقدیر صرف بلوچستان کے عوام کے ہاتھ میں ہے۔

چیف آف آرمی اسٹاف وچیف آف ڈیفنس فورسز فیلڈ مارشل سید عاصم منیر نے بلوچستان کی اہم شخصیات اور سیاسی قیادت سے ملاقات کی۔ انہوں نے کہا کہ بلوچستان اور پاکستان کا حال اور مستقبل ایک ہے اور ہمیشہ ایک رہے گا۔ بلوچستان باصلاحیت، ثابت قدم، محب وطن اور باوقار عوام کی سرزمین ہے۔@KulAalam pic.twitter.com/yZpGNOV0HN

— Media Talk (@mediatalk922) August 21, 2026

ملاقات میں شریک اہم شخصیات نے بلوچستان اور پاکستان میں امن، ترقی اور خوشحالی کے عزم کا اعادہ کیا۔ شرکا نے امن و استحکام کے خلاف تمام بیرونی سرپرستی یافتہ خطرات کے مقابلے میں ریاست اور مسلح افواج کے شانہ بشانہ کھڑے رہنے کے عزم کا اظہار کیا۔

شرکا نے عوام پر مرکوز ترقی کے لیے اپنا کردار ادا کرنے کے عزم کا اظہار کرتے ہوئے کہا کہ بلوچستان کو پُرامن، مستحکم اور خوشحال بنانے کے لیے مشترکہ کوششیں جاری رکھی جائیں گی، جہاں سچ کی بالادستی ہو اور دشمن قوتوں کا بیانیہ اپنے ہی جھوٹے پروپیگنڈے اور فریب میں دفن ہوجائے۔