پیر 5 اکتوبر 2026 
عالمی منڈی میں سونے کی قیمت(Gold Rates) پیر کو بڑھ گئی، جس کی بنیادی وجہ امریکا کے حالیہ کمزور معاشی اعداد و شمار کے بعد اکتوبر میں فیڈرل ریزرو کی جانب سے شرح سود میں اضافے کے امکانات میں نمایاں کمی ہے۔ شرح سود میں اضافے کے امکانات کم ہونے سے منافع نہ دینے والے اثاثے سونے کی کشش میں اضافہ ہوا۔
اسپاٹ گولڈ کی قیمت 0.4 فیصد اضافے کے بعد 4 ہزار 158.17 ڈالر فی اونس ہوگئی، جبکہ دسمبر کے لیے امریکی گولڈ فیوچرز 0.6 فیصد بڑھ کر 4 ہزار 186.40 ڈالر فی اونس پر پہنچ گئے۔
اعداد و شمار کے مطابق ستمبر میں امریکا میں روزگار میں اضافہ توقعات کے مقابلے میں زیادہ سست رہا، جبکہ گزشتہ دو ماہ کے نان فارم پے رولز کے اعداد و شمار میں بھی نمایاں کمی کی گئی۔
مزیدپڑھیں:بھارتی اداکار سنجے دت نے خاموشی توڑ دی، بڑا بیان سامنے آگیا
کے سی ایم ٹریڈ کے چیف مارکیٹ تجزیہ کار ٹم واٹرر (Tim Waterer) نے کہا کہ کمزور لیبر مارکیٹ کے اعداد و شمار نے اکتوبر میں فیڈرل ریزرو کی جانب سے شرح سود میں اضافے کی توقعات کم کردی ہیں، جس سے سونے کی قیمت کو کچھ سہارا ملا ہے۔ تاہم مارکیٹ اب بھی فیڈرل ریزرو کے مجموعی شرح سود بڑھانے کے چکر کو برقرار سمجھ رہی ہے۔
سی ایم ای فیڈ واچ ٹول کے مطابق اکتوبر میں شرح سود میں اضافے کا امکان اب 22 فیصد رہ گیا ہے، جو ایک ہفتہ قبل 64 فیصد تھا، جبکہ دسمبر میں شرح سود بڑھنے کا امکان 87 فیصد پر برقرار ہے۔
امریکی مرکزی بینک نے گزشتہ ماہ شرح سود میں 25 بیسس پوائنٹس کا اضافہ کرتے ہوئے اسے 3.75 سے 4 فیصد کی حد میں کردیا تھا۔
دریں اثنا مشرق وسطیٰ کی صورتحال بھی سونے کی قیمتوں پر اثرانداز ہورہی ہے۔ یمن کی سعودی حمایت یافتہ حکومت نے حوثیوں کے زیر قبضہ علاقوں کو واپس لینے کے لیے بڑی فوجی کارروائی شروع کرنے کا اعلان کیا ہے۔
دیگر قیمتی دھاتوں میں چاندی کی قیمت 1.7 فیصد اضافے کے بعد 61.40 ڈالر فی اونس ہوگئی، پلاٹینم 0.6 فیصد بڑھ کر 1,708.48 ڈالر جبکہ پیلیڈیم 0.6 فیصد اضافے کے بعد 1,175.04 ڈالر فی اونس کی سطح پر پہنچ گیا۔
