بدھ 14 اکتوبر 2026 
برطانیہ میں مصنوعی ذہانت (اے آئی) کی مدد سے ایک شہری نے تین سال سے جاری قانونی جنگ جیت لی، عدالت میں سماعت شروع ہونے سے قبل ہی اس کے خلاف عائد 300 پاؤنڈ کا ٹریفک جرمانہ منسوخ کر دیا گیا۔
مانچسٹر ایوننگ نیوز کے مطابق انگلینڈ کی کاؤنٹی ایسیکس سے تعلق رکھنے والے رافال گورفال کو اگست 2023 میں پارکنگ فیس بروقت ادا نہ کرنے پر 100 پاؤنڈ جرمانے کا سامنا کرنا پڑا تھا۔
رافال گورفال کے مطابق وہ پارکنگ ٹکٹ حاصل کرنے کے لیے ادائیگی کی مشین پر گئے، جہاں انہیں طویل قطار میں انتظار کرنا پڑا۔ بعد ازاں انہیں معلوم ہوا کہ مشین صرف نقد رقم قبول کرتی ہے اور کریڈٹ کارڈ کے ذریعے ادائیگی کی سہولت دستیاب نہیں تھی۔
ادائیگی میں تاخیر کے تقریباً دو ہفتے بعد انہیں 100 پاؤنڈ جرمانے کا نوٹس موصول ہوا، جس میں مؤقف اختیار کیا گیا تھا کہ انہوں نے مقررہ 16 منٹ کے اندر پارکنگ فیس ادا نہیں کی۔
رافال گورفال نے جرمانے کو چیلنج کیا اور معاملہ قانونی کارروائی تک پہنچ گیا۔ جنوری 2024 میں مقدمے کی پہلی سماعت ہوئی، جبکہ اس دوران جرمانے کی رقم 100 سے بڑھ کر 170 پاؤنڈ ہوگئی اور بعد ازاں قانونی کارروائی طویل ہونے کے باعث 300 پاؤنڈ تک پہنچ گئی۔
رافال گورفال نے کہا کہ مقدمے کے دوران تقریباً ڈیڑھ سال تک انہیں کوئی نوٹس موصول نہیں ہوا، تاہم بعد میں ایک خط کے ذریعے بتایا گیا کہ مقدمے کی سماعت اکتوبر 2026 میں ہوگی۔
چیٹ جی پی ٹی نے دفاع کی تیاری میں مدد کی
طویل قانونی جنگ سے پریشان ہو کر رافال گورفال نے اپنے دفاع کے لیے مصنوعی ذہانت کے چیٹ بوٹ چیٹ جی پی ٹی سے مدد لینے کا فیصلہ کیا۔ انہوں نے قانونی تنازع سے متعلق خطوط اور دستاویزات چیٹ جی پی ٹی کو فراہم کیں اور دفاع کی تیاری کے لیے رہنمائی حاصل کی۔
انہوں نے کہا کہ چیٹ جی پی ٹی نے انہیں بتایا کہ متعلقہ حکام کے سامنے اپنا مؤقف کیسے پیش کرنا ہے، کن اداروں سے رجوع کرنا ہے اور قانونی دفاع کس طرح تیار کرنا ہے۔
رپورٹ کے مطابق، رافال گورفال نے اس رہنمائی کی مدد سے اپنی تیاری مکمل کی، تاہم عدالت میں سماعت شروع ہونے سے پہلے ہی انہیں ای میل موصول ہوئی، جس میں مقدمہ اور جرمانہ واپس لینے کی اطلاع دی گئی۔یوں تقریباً تین سال سے جاری قانونی تنازع ختم ہوگیا اور رافال گورفال کو 300 پاؤنڈ کے جرمانے سے نجات مل گئی۔
مزید پڑھیں:ڈیرہ اسماعیل خان، 2 گروپوں کے درمیان فائرنگ ، 5 افراد جاں بحق ، 3 زخمی
یہ واقعہ قانونی معاملات میں مصنوعی ذہانت سے مدد لینے کے بڑھتے ہوئے رجحان کی ایک مثال ہے، تاہم فراہم کردہ معلومات سے یہ ثابت نہیں ہوتا کہ جرمانہ واپس لینے کا فیصلہ براہ راست چیٹ جی پی ٹی کی رہنمائی کے باعث کیا گیا۔
