منگل 28 اکتوبر 2025 
ریاض:سعودی عرب کے دارالحکومت ریاض میں فیوچر انویسٹمنٹ انیشیٹو (FII) کی 9ویں سالانہ کانفرنس جاری ہے، جس کے تحت اعلیٰ سطح گول میز اجلاس منعقد ہوا۔ اجلاس کا موضوع “کیا انسانیت صحیح سمت کی طرف گامزن ہے؟” رکھا گیا، جس میں وزیراعظم محمد شہباز شریف نے پاکستان کی نمائندگی کرتے ہوئے شرکت کی اور کلیدی خطاب کیا۔
وزیراعظم شہباز شریف نے کہا کہ “ہم اپنی غلطیوں سے سیکھ کر آگے بڑھ رہے ہیں” اور پاکستان قدرتی وسائل سے مالا مال ملک ہے۔ انہوں نے سعودی ولی عہد شہزادہ محمد بن سلمان کے ترقیاتی ویژن کا خیرمقدم کرتے ہوئے کہا کہ پاکستان کرپشن کے خاتمے کے لیے ٹھوس اقدامات کر رہا ہے۔
انہوں نے بتایا کہ پاکستان کی 60 فیصد آبادی نوجوانوں پر مشتمل ہے، جو ملک کی طاقت ہیں۔ ایف بی آر کو مکمل ڈیجیٹائز کر دیا گیا ہے، جس سے کرپشن میں خاطر خواہ کمی آئی ہے۔ پاکستان تیزی سے مصنوعی ذہانت (اے آئی) کی جانب بڑھنے والے ممالک میں شامل ہے اور کوشش ہے کہ زراعت کو بھی اے آئی ٹیکنالوجی سے منسلک کیا جائے۔
موسمیاتی تبدیلیوں کے حوالے سے وزیراعظم نے خبردار کیا کہ **پاکستان موسمیاتی تبدیلی سے سب سے زیادہ متاثر ہونے والے 10 ممالک میں شامل ہے۔ رواں سال ایک بار پھر سیلاب اور کلاؤڈ برسٹ نے تباہی مچائی، لیکن ہم روک تھام کے لیے کچھ نہ کر سکے۔ انہوں نے کہا کہ “ہم ترقی کی سیڑھی پر چڑھتے ہیں، قدرتی آفات سے نیچے آ جاتے ہیں” اور اپنے پیروں پر کھڑا ہونے کی بھرپور کوشش کر رہے ہیں۔
وزیراعظم نے عالمی برادری سے اپیل کی کہ موسمیاتی تبدیلی سے ہونے والے نقصانات کے ازالے اور بحالی کے عمل کے لیے پاکستان کو زیادہ فنڈز کی ضرورت ہے۔
کانفرنس میں پاکستان کی معاشی، تکنیکی اور ماحولیاتی ترقی کے لیے نئے مواقع تلاش کیے جا رہے ہیں، جبکہ وزیراعظم شہباز شریف کی شرکت سے پاک-سعودی تعلقات کو مزید فروغ ملنے کی توقع ہے۔
