پیر 3 نومبر 2025 
اسلام آباد : وزیرِ دفاع خواجہ آصف نے کہا ہے کہ پاکستان کی خارجہ پالیسی ایک نئے اور متحرک مرحلے میں داخل ہو چکی ہے، جس کا مقصد عالمی برادری کے ساتھ تعلقات کو مزید مستحکم اور متوازن بنانا ہے۔
انہوں نے کہا کہ چین پاکستان کا ہر موسم کا دوست ہے، اور دونوں ممالک کے درمیان تعلقات باہمی اعتماد اور تعاون کی بنیاد پر قائم ہیں۔ وزیرِ دفاع نے بتایا کہ پاکستان اور چین سی پیک (CPEC) کے تیسرے مرحلے میں داخل ہو چکے ہیں، اور دونوں ممالک اس منصوبے پر کام کی رفتار بڑھانے کے لیے پرعزم ہیں۔
خواجہ آصف نے کہا کہ پاکستان کی وسط ایشیائی ممالک، آذربائیجان اور ترکمانستان تک رسائی میں نمایاں بہتری آئی ہے، جس سے علاقائی روابط اور تجارت کے نئے مواقع پیدا ہو رہے ہیں۔
وزیر دفاع نے اس بات پر زور دیا کہ پاکستان عالمی سطح پر اسلامو فوبیا کے خلاف ایک مؤثر آواز بن کر ابھرا ہے، اور بین الاقوامی فورمز پر مسلمانوں کے حقوق کے تحفظ کے لیے سرگرم کردار ادا کر رہا ہے۔
انہوں نے مزید کہا کہ سعودی عرب کی جانب سے پاکستان میں مختلف شعبوں میں سرمایہ کاری میں تیزی سے اضافہ ہو رہا ہے، جو دونوں ممالک کے قریبی تعلقات کا مظہر ہے۔
خواجہ آصف کا کہنا تھا کہ آج پاکستان کی سفارتکاری اعتماد، استحکام اور مثبت امیج کی عکاسی کر رہی ہے، اور عالمی سطح پر پاکستان کا مؤقف پہلے سے زیادہ مضبوط اور واضح ہو کر سامنے آ رہا ہے۔
