منگل 11 نومبر 2025 
اسلام آباد(نیوز ڈیسک) قومی اسمبلی کے اجلاس کے دوران اسپیکر قومی اسمبلی سردار ایاز صادق نے قائدِ حزبِ اختلاف کی تعیناتی سے متعلق اظہارِ خیال کرتے ہوئے کہا کہا کے یہ معاملہ عدالت میں زیر سماعت ہے، لہٰذا اسمبلی اس معاملے پر کسی پیش رفت سے قبل عدالتی فیصلے کی منتظر ہے۔
اسپیکر سردار ایاز صادق نے سابق اسپیکر اسد قیصر اور عامر ڈوگر سے ہونے والی ملاقات کا حوالہ دیتے ہوئے کہا کہ قائد حزبِ اختلاف کی تعیناتی کا معاملہ سپریم کورٹ آف پاکستان نے پشاور ہائی کورٹ کو واپس بھیج دیا ہے، جہاں یہ کیس زیرِ سماعت ہے۔ اسپیکر نے کہا کہ عدالت کے فیصلے کے بعد معاملے کو زیر غور لایا جائے گا۔ مزید برآں انہوں نے کہا کہ کئی ممبران کی عدالتوں کے فیصلوں سے رکنیت بحال ہوئی ہے۔
مزید برآں، اسپیکر سردار ایاز صادق نے قائمہ کمیٹیوں میں اپوزیشن کے عدم شرکت کے حوالے سے اپنے ریماکس دیتے ہوئے کہا کہ اپوزیشن کی عدم شمولیت کے باوجود قائمہ کمیٹیاں اپنا کام باقاعدگی سے جاری رکھے ہوئے ہیں۔ انہوں نے کہا کہ کمیٹیوں کے اجلاس ممبران کی ریکوزیشن پر باقاعدگی سے بلائے جا رہے ہیں اور پارلیمانی کارروائی متاثر نہیں ہو رہی۔
اسپیکر نے کہا کہ قائمہ کمیٹی برائے قانون و انصاف سمیت دیگر کمیٹیوں میں اپوزیشن اراکین کو اپنی تجاویز پیش کرنے کے مواقع فراہم کیے گئے۔ انہوں نے یاد دلایا کہ 26ویں آئینی ترمیم کے دوران اپوزیشن کی جانب سے پیش کردہ متعدد تجاویز کو قانون میں شامل کیا گیا تھا، جو پارلیمانی عمل میں اپوزیشن کے مثبت کردار کی عکاسی کرتا ہے۔انہوں نے اپوزیشن اراکین سے کہا کے وہ پارلیمانی کمیٹیوں میں شرکت کریں-
