ہفتہ 15 نومبر 2025 
ممبئی(نیوز ڈیسک)بالی ووڈ جوڑی راجکمار راؤ اور پترالیکھا کی چوتھی شادی کی سالگرہ اس وقت مزید خاص بن گئی جب 15 نومبر کو ان کے ہاں بیٹی کی پیدائش ہوئی۔
’سٹی لائٹس‘ کے اس جوڑے نے خوشی کی یہ خبر انسٹاگرام پر ایک مشترکہ پوسٹ کے ذریعے دی اور اپنی بیٹی کو خدا کی سب سے بڑی نعمت قرار دیا۔
راجکمار راؤ نے لکھا کہ “یہ سب سے بڑی نعمت ہے جو خدا نے ہمیں ہماری چوتھی شادی کی سالگرہ کے دن عطا کی ہے۔”
خبر سامنے آتے ہی مداحوں اور ساتھی فنکاروں کی جانب سے مبارکبادوں کا سلسلہ شروع ہوگیا۔
جوڑے نے اپنی شادی کے تقریباً تین سال بعد، 9 جولائی کو انسٹاگرام پر حمل کی خبر دی تھی جس میں لکھا تھا “بیبی آن دا وے”۔
پترالیکھا نے پہلے ایک انٹرویو میں بتایا تھا کہ وہ بچے کی آمد کے بعد نیوزی لینڈ کے جنوبی حصے کا سفر کرنے کا ارادہ رکھتی ہیں، کیونکہ وہ حصہ وہ پہلے دیکھ نہیں سکے۔ ان کا کہنا تھا، “ہوسکتا ہے ہم بَن جی جمپنگ یا کوئی اور دلچسپ کام بھی کریں—شاید بچے کے ساتھ!”
راجکمار راؤ نے 2013 کی فلم شاہد میں حقیقت پر مبنی کردار ادا کرکے شہرت حاصل کی۔ انہوں نے پترالیکھا سے 15 نومبر 2021 کو شادی کی تھی۔
