اتوار 16 نومبر 2025 
راولپنڈی(نیوزڈیسک) پاکستان نے سری لنکا کو تیسرے میچ میں شکست دیکر سیریز 0- 3 سے جیت لی، سری لنکا نے پاکستان کو 212 رنز کا ہدف دیا۔
راولپنڈی کرکٹ اسٹیڈیم میں کھیلے جا رہے میچ میں پاکستان نے سری لنکا کے خلاف ٹاس جیت کر پہلے فیلڈنگ کا فیصلہ کیا۔
مہمان ٹیم 46 اوورز میں 211 رنز پر پویلین لوٹ گئی۔
سدیرا سمارا وکرما نے48، کوشال مینڈس نے 34، کامل مشارا نے 29 اور پوون رتنائیکے نے 32 رنز کی اننگز کھیلی۔
پاکستان کے محمد وسیم جونیئر نے 3، حارث رؤف اور فیصل اکرم نے 2، 2 کھلاڑیوں کو آؤٹ کیا۔
پاکستان نے سری لنکا کا دیا گیا 212 رنز کا ہدف 32 گیندوں قبل 4 وکٹوں کے نقصان پر حاصل کر لیا، ہدف کے تعاقب میں پاکستانی بلے بازوں نے خطرات سے بچتے ہوئے محتاط مگر موثر بیٹنگ کی۔
فخر زمان اور بابر اعظم نے 74 رنز کی اہم شراکت قائم کی، جس نے ہدف کی بنیاد مضبوط کر دی، آخری مراحل میں محمد رضوان نے ناقابل شکست 60 رنز کی اننگ کھیلی جبکہ حسین طلعت 38 رنز بنا کر ناٹ آؤٹ رہے۔
میچ کا فیصلہ 44ویں اوور میں اس وقت ہوا جب تھیشنا کی گیند پر حسین طلعت نے شاندار چار رنز لگا کر پاکستان کو سیریز میں فیصلہ کن فتح دلا دی۔
پاکستان نے میچ 6 وکٹوں سے جیت کر سیریز میں وائٹ واش مکمل کیا۔ یہ سری لنکا کے خلاف پاکستان کی تیسری کلین سویپ سیریز ہے۔
پاکستان کرکٹ ٹیم نے سیریز کے آخری میچ میں 4 تبدیلیاں کیں، فیصل اکرم، شاہین آفریدی، فہیم اشرف اور حسیب اللّٰہ پلیئنگ الیون میں شامل کیے گئے۔
سری لنکن ٹیم کے کپتان چریتھ اسالنکا بیمار ہو گئے ہیں، آج کے میچ میں کوشال مینڈس قیادت کر رہے ہیں۔
