ہفتہ 27 ستمبر 2025 
بھارت سمیت دنیا بھر میں ہندو برادری نوراتری کا تہوار جوش و خروش سے منا رہی ہے، تاہم اس بار پاکستان سے سامنے آنے والی ویڈیوز نے بھارتی صارفین کو بھی حیران کر دیا۔
یہ ویڈیوز پاکستانی کنٹینٹ کریئیٹرز کی جانب سے شیئر کی گئیں جن میں پاکستانی ہندو کمیونٹی کو روایتی لباس میں گربا اور ڈانڈیا کرتے ہوئے دیکھا جا سکتا ہے۔
پاکستان میں رہائش پذیر ہندو کنٹینٹ کریئیٹر پریتم دیوریا نے اپنی انسٹاگرام پوسٹ کے ذریعے نوراتری کی ایک تقریب کی جھلکیاں شیئر کیں، جس میں شرکا نے گربا اور ڈانڈیا کی محفل کو رنگین بنا دیا۔ ایک اور ویڈیو دھیرج کی جانب سے شیئر کی گئی، جو کراچی میں منعقدہ تقریب کی ہے۔
ان ویڈیوز کے وائرل ہوتے ہی بھارتی صارفین نے خوشی اور حیرت کا اظہار کیا۔ کئی افراد نے کہا کہ ”پاکستان میں نوراتری کا جشن دیکھنا واقعی خوشگوار حیرت ہے۔“ ایک اور صارف نے تبصرہ کیا: ”یہ دیکھ کر اچھا لگتا ہے کہ لوگ اپنی مذہبی روایات آزادی کے ساتھ مناتے ہیں۔“
کچھ بھارتی صارفین نے پاکستانی ہندو برادری کو مبارکباد دیتے ہوئے دل والے ایموجیز شیئر کیے، جبکہ دیگر نے سوال کیا کہ پاکستان میں ہندو کس طرح اپنی رسومات مناتے ہیں۔
یاد رہے کہ اس سال شاردیہ نوراتری 22 ستمبر سے شروع ہوئی اور 2 اکتوبر تک جاری رہے گی۔ یہ تہوار دیوی درگا کے نو روپوں کی پوجا کے لیے منایا جاتا ہے اور ہر دن ایک مخصوص رنگ کے ساتھ منسوب ہے۔ سفید، سرخ، نیلا، پیلا اور سبز سمیت نو رنگ نوراتری کی عبادات اور تقریبات کا حصہ ہوتے ہیں۔
