اتوار 28 ستمبر 2025 
پاکستان کرکٹ بورڈ (پی سی بی) نے بھارتی کپتان سوریا کمار یادیو کے بعد بھارتی فاسٹ بولر ارشدیپ سنگھ کے خلاف بھی ایکشن لے لیا۔
ذرائع کے مطابق پی سی بی نے بھارتی کھلاڑی کے خلاف انٹرنیشنل کرکٹ کونسل (آئی سی سی) میں درخواست دے دی ہے جس میں کہا گیا ہے کہ ارشدیپ نے آئی سی سی کوڈ آف کنڈکٹ کی خلاف ورزی کی۔
اس حوالے سے کہا گیا ہے کہ ارشدیپ نے 21 ستمبر کو میچ کے اختتام پر انتہائی نازیبا اشارے کیے، انہوں نے تماشائیوں کو غیر اخلاقی اشارے کیے۔
ذرائع کا کہنا ہے کہ درخواست میں کہا گیا ہے کہ ارشدیپ نے غیر اخلاقی اشارے کر کے کھیل کی ساکھ مجروح کی۔
بھارتی فاسٹ بولر کے خلاف ضابطہ اخلاق کی خلاف ورزی پر ایکشن کا مطالبہ کیا گیا ہے۔
یاد رہے کہ اس سے قبل پاکستان کرکٹ بورڈ (پی سی بی) نے بھارتی کپتان سوریا کمار کے خلاف انٹرنیشنل کرکٹ کونسل (آئی سی سی) کو خط لکھا تھا۔
ذرائع کے مطابق پاکستان کرکٹ بورڈ نے بھارتی کپتان سوریا کمار کے خلاف آئی سی سی کو تفصیلی خط لکھا تھا، آئی سی سی کی جانب سے بھارتی کپتان کے خلاف پی سی بی کے مؤقف کو تسلیم کیا گیا تھا۔
پی سی بی کے خط کے متن کے مطابق سوریا کمار نے کھیل کو سیاست میں ملوث کرنے اور اس کی شہرت کو نقصان پہنچایا۔
