معلومات تک رسائی ہر شہری کا بنیادی اور جمہوری حق ہے،صدر مملکت

اسلام آباد (نیوز ڈیسک) صدرِ مملکت آصف علی زرداری نے عالمی دن برائے معلومات تک رسائی کے موقع پر اپنے پیغام میں کہا ہے کہ معلومات تک رسائی ہر شہری کا بنیادی اور جمہوری حق ہے۔ انہوں نے کہا کہ معلومات کا آزادانہ بہاؤ شفافیت، جوابدہی اور اچھی حکمرانی کو فروغ دیتا ہے۔

صدر نے اس بات پر تشویش کا اظہار کیا کہ غلط معلومات اور جعلی خبروں کے ذریعے سچ کو مسخ کرنا آج کے دور کا ایک بڑا چیلنج بن چکا ہے، جس سے قومی یکجہتی اور اداروں پر عوامی اعتماد کو نقصان پہنچتا ہے۔ ان کا کہنا تھا کہ ذمہ دارانہ رپورٹنگ اور درست معلومات کی فراہمی جمہوری استحکام کے لیے ناگزیر ہے۔

صدر آصف علی زرداری نے کہا کہ معلومات تک بروقت اور درست رسائی شہریوں کو بااختیار بناتی ہے، جبکہ باخبر معاشرہ ہی شفافیت، ترقی اور انصاف کی بنیاد رکھتا ہے۔

انہوں نے عوام سے اپیل کی کہ سوشل میڈیا پر غیر مصدقہ معلومات کے پھیلاؤ سے گریز کیا جائے اور اداروں پر زور دیا کہ وہ معلومات تک رسائی کے نظام کو مزید مؤثر بنائیں تاکہ شہری اپنے حقوق اور ذمہ داریوں سے بہتر طور پر آگاہ رہ سکیں۔