وزیرِ اعظم شہباز شریف ورلڈ اکنامک فورم 2026 میں شرکت کے لیے ڈایووس روانہ

اسلام آباد(نیوز ڈیسک)وزیرِ اعظم محمد شہباز شریف ورلڈ اکنامک فورم (WEF) کی سالانہ کانفرنس 2026 میں شرکت کے لیے ڈایووس، سوئٹزرلینڈ روانہ ہو گئے ہیں۔ وزیرِ اعظم 19 سے 23 جنوری 2026 تک جاری رہنے والی اس عالمی کانفرنس میں پاکستان کی نمائندگی کریں گے۔

وزیرِ اعظم کے ہمراہ ایک اعلیٰ سطحی وفد بھی ہے، جس میں نائب وزیرِ اعظم و وزیرِ خارجہ محمد اسحاق ڈار، وزیرِ اقتصادی امور احد چیمہ، وزیرِ اطلاعات عطا اللہ تارڑ، معاونِ خصوصی طارق فاطمی اور دیگر سینئر حکام شامل ہیں۔

دورے کے دوران وزیرِ اعظم کی متعدد اہم سفارتی اور اقتصادی مصروفیات شیڈول ہیں۔ وہ مختلف سربراہانِ مملکت و حکومت، عالمی مالیاتی اداروں اور بین الاقوامی تنظیموں کے قائدین سے دو طرفہ ملاقاتیں کریں گے، جن میں علاقائی و عالمی امور، اقتصادی تعاون اور سرمایہ کاری کے امکانات پر تبادلۂ خیال کیا جائے گا۔

دورے کا ایک اہم جزو بزنس راؤنڈ ٹیبل اجلاس ہے، جس کا مشترکہ اہتمام پاکستان اور ورلڈ اکنامک فورم کر رہے ہیں۔ اس اجلاس میں عالمی سطح کی نمایاں کمپنیوں کے سربراہان اور سرمایہ کار شریک ہوں گے، جو پاکستان میں سرمایہ کاری کے نئے مواقع تلاش کرنے یا اپنی موجودہ سرمایہ کاری کو مزید وسعت دینے میں دلچسپی رکھتے ہیں۔

حکومتی ذرائع کے مطابق وزیرِ اعظم اس موقع پر پاکستان کی معاشی بحالی، اصلاحاتی ایجنڈے اور سرمایہ کار دوست پالیسیوں کو اجاگر کریں گے، جبکہ عالمی کاروباری برادری کو پاکستان میں تجارت اور سرمایہ کاری کی دعوت بھی دی جائے گی۔