اسرائیل میں فلسطینی قیدیوں کو پھانسی دینے کا متنازع بل منظور 

 اسرائیلی پارلیمان کی قومی سلامتی کمیٹی نے ایک متنازع بل کی منظوری دے دی جس کے تحت اسرائیلی جیلوں میں قید فلسطینی قیدیوں کو سزائے موت دی جا سکے گی۔ یہ بل “دہشت گردوں کے لیے سزائے موت کے عنوان سے پیش کیا گیا، جسے 1 کے مقابلے میں 4 ووٹوں سے منظور کر کے مکمل ووٹنگ کے لیے آگے بھیج دیا گیا۔
کمیٹی کے قانونی مشیر کے مطابق یہ ووٹنگ پارلیمانی چھٹی کے دوران ہوئی، اس لیے اس کی قانونی حیثیت مشکوک ہے۔ انہوں نے سیکیورٹی حکام کی غیر موجودگی اور بل پر ناکافی بحث پر بھی اعتراضات اٹھائے۔
 اسرائیلی وزیرِاعظم کے قیدیوں سے متعلق امور کے نمائندے گال ہرش نے بھی خبردار کیا ہے کہ اس قانون سے غزہ میں قید اسرائیلی شہریوں کی رہائی کی کوششیں متاثر ہو سکتی ہیں۔ یاد رہے، یہ بل ماضی میں بھی انہی خدشات کے باعث مسترد کیا جا چکا ہے۔