صدرِ مملکت نے پارلیمنٹ کا مشترکہ اجلاس 23 جنوری کو طلب کر لیا

اسلام آباد(نیوز ڈیسک)صدرِ مملکت نے پارلیمنٹ کا مشترکہ اجلاس جمعہ 23 جنوری 2026 کو صبح 11 بجے طلب کر لیا ہے۔ پارلیمنٹ کے مشترکہ اجلاس کی سمری وزارتِ پارلیمانی امور کی جانب سے بھجوائی گئی تھی، جس کی منظوری صدرِ مملکت نے دے دی۔

ذرائع کے مطابق مشترکہ اجلاس میں 20 سے زائد اہم بلوں پر قانون سازی کی جائے گی، جن میں مختلف قومی اور انتظامی نوعیت کے مسوداتِ قانون شامل ہیں۔

وزارتِ قانون اور وزارتِ پارلیمانی امور نے اجلاس کے انعقاد کے لیے تمام انتظامی اور پارلیمانی تیاریاں مکمل کر لی ہیں۔ اجلاس میں کورم پورا رکھنے کے لیے وفاقی وزیر ڈاکٹر طارق فضل کو خصوصی ذمہ داری سونپ دی گئی ہے۔

حکومتی ذرائع کا کہنا ہے کہ مشترکہ اجلاس میں قانون سازی کے عمل کو مؤثر اور بروقت مکمل کرنے پر توجہ دی جائے گی، جبکہ تمام متعلقہ وزارتوں اور پارلیمانی ارکان کو اجلاس میں شرکت یقینی بنانے کی ہدایات بھی جاری کر دی گئی ہیں۔