پیر 29 ستمبر 2025 
دنیا اور خطے کو جوڑنے کے عنوان سے عالمی ٹرانسپورٹ نمائش اور بین الاقوامی کانفرنس کل (منگل) سے متحدہ عرب امارات میں شروع ہوگی۔ وزیراعظم شہباز شریف کی ہدایت پر وزیر مملکت برائے خزانہ و ریلوے بلال اظہر کیانی پاکستان کی نمائندگی کے لیے ابوظہبی روانہ ۔
تین روزہ ’گلوبل ٹرانسپورٹ انفراسٹرکچر نمائش اور کانفرنس‘ 2 اکتوبر تک جاری رہے گی، جس میں دنیا بھر سے ریل کے شعبے کے 20 ہزار سے زائد نمائندے شرکت کر رہے ہیں۔ ابوظہبی قومی نمائش مرکز میں منعقد ہونے والی اس نمائش میں 200 کمپنیاں حصہ لے رہی ہیں، جبکہ 100 ممالک سے 800 مندوبین کانفرنس میں شریک ہوں گے۔ اس دوران 200 مقررین مختلف سیشنز میں خطاب کریں گے۔
وزیر مملکت بلال اظہر کیانی ’مستقبل کی ٹرانسپورٹ اور عالمی رابطوں‘ کے موضوع پر خصوصی مہمان کے طور پر کلیدی خطاب کریں گے۔ اس کے علاوہ، وہ یو اے ای کے ریلوے سٹیشن کا دورہ کریں گے اور تیز رفتار جدید ٹرین میں سفر کا تجربہ بھی کریں گے۔
اس بین الاقوامی کانفرنس اور نمائش کا اہتمام یو اے ای کے قومی ریل نیٹ ورک کی ترقی اور انتظام کے ذمہ دار ادارے اتحاد ریل نے کیا ہے۔ اتحاد ریل کے چیئرمین شیخ طیب بن محمد بن زاید آل نہیان کی دعوت پر وزیر مملکت بلال اظہر کیانی اس ایونٹ میں شرکت کر رہے ہیں۔
دورے کے دوران وزیر مملکت بلال اظہر کیانی کی یو اے ای کے وزیر توانائی و انفراسٹرکچر سہیل محمد فرج المزروعی اور اتحاد ریل کے سی ای او انجینئر سے دوطرفہ ملاقاتیں بھی ہوں گی۔
کانفرنس کے پہلے دن تیز رفتار ریل، مصنوعی ذہانت (اے آئی) اور ڈیٹا، ڈیجیٹل اثاثہ جات کی زندگی کے دورانیہ کا انتظام، اور آپریشنل استعداد کار میں اضافے کے موضوعات پر تبادلہ خیال کیا جائے گا۔ دوسرے اور تیسرے دن سائبر سیکیورٹی، شہری منصوبہ بندی، مسافروں کو بہترین سفری سہولیات کی فراہمی سمیت دیگر اہم موضوعات زیر غور آئیں گے۔
یہ ایونٹ عالمی رابطوں اور ٹرانسپورٹ کے شعبے میں جدید ٹیکنالوجیز اور پائیدار حل کے فروغ کے لیے ایک اہم پلیٹ فارم ثابت ہوگا۔
