گرین پاکستان انیشیئٹوو(جی پی آئی)کی رہنمائی میں ڈے زی پرائیویٹ لمیٹڈ کی زرعی و لائیو اسٹاک میں نمایاں پیش رفت

اسلام آباد (نیوز ڈیسک)گرین پاکستان انیشیئٹو (جی پی آئی) کی رہنمائی میں ڈے زی پرائیویٹ لمیٹڈ نے زرعی اور لائیو اسٹاک کے شعبے میں نمایاں پیش رفت حاصل کر لی ہے، جس کے تحت جدید ٹیکنالوجی کے استعمال سے بنجر اور صحرائی زمین کو قابلِ کاشت بنایا جا رہا ہے اور پائیدار زرعی ترقی کو فروغ دیا جا رہا ہے۔

ذرائع کے مطابق جی پی آئی کی موثر حکمت عملی کے باعث زرعی و لائیو اسٹاک کا شعبہ جدید ٹیکنالوجی اور دیرپا خوشحالی کی جانب گامزن ہے۔ ڈے زی پرائیویٹ لمیٹڈ نے جدید زرعی طریقوں کے ذریعے تقریباً تین ہزار ایکڑ بنجر اور صحرائی زمین کو قابلِ کاشت بنا دیا ہے۔

کمپنی کی جانب سے روڈز گراس اور الفالفہ جیسا قابلِ برآمد چارہ جدید سینٹرل پیوٹ آبپاشی نظام کے تحت کاشت کیا جا رہا ہے، جس سے پانی کے مؤثر استعمال کے ساتھ پیداوار میں نمایاں اضافہ ممکن ہوا ہے۔

لائیو اسٹاک کے شعبے میں بھی ڈے زی پرائیویٹ لمیٹڈ اعلیٰ امریکی نسلوں کے جانوروں کی جدید سائنسی طریقوں سے افزائش کر رہی ہے۔ اس مقصد کے لیے “آئی وی ایف” اور “ایمبریو ٹرانسفر” پروگرامز کے ذریعے جانوروں کی بہتر جینیاتی نسلیں حاصل کی جا رہی ہیں تاکہ دودھ اور گوشت کی پیداوار میں معیار اور مقدار دونوں میں بہتری لائی جا سکے۔

جی پی آئی کے جدید اقدامات زرعی اور لائیو اسٹاک شعبے میں دیرپا استحکام اور مسلسل پیش رفت کو یقینی بنا رہے ہیں۔ ماہرین کے مطابق جی پی آئی کی نگرانی میں ڈے زی پرائیویٹ لمیٹڈ جدید زراعت اور لائیو اسٹاک کی ترقی کا ایک نمایاں اور کامیاب ماڈل بن کر سامنے آیا ہے۔

رپورٹ کے مطابق جی پی آئی کی رہنمائی میں زرعی و لائیو اسٹاک ترقی کا خواب اب محض منصوبہ نہیں رہا بلکہ جدید ٹیکنالوجی اور عملی پیش رفت کی شکل اختیار کر چکا ہے، جو ملکی معیشت اور خوراک کی خود کفالت کی جانب ایک اہم قدم قرار دیا جا رہا ہے۔