پیر 16 فروری 2026 
بہاولپور(نیوز ڈیسک) سینئر صوبائی وزیر مریم اورنگزیب نے کہا ہے کہ وزیراعلیٰ مریم نواز کے وژن کو سلام پیش کرتی ہوں، پنجاب میں ثقافتی اور سیاحتی سرگرمیوں کے ذریعے رونقیں دوبارہ بحال ہو رہی ہیں۔
چولستان جیپ ریلی کی تقریب سے خطاب کرتے ہوئے انہوں نے کہا کہ لاہور میں 25 سال بعد بسنت منائی گئی جس سے عوام میں خوشی کی لہر دوڑ گئی، نوازشریف کی خواہش تھی کہ پنجاب اور لاہور میں بسنت دوبارہ بحال ہو اور مقامی ثقافت کو فروغ ملے۔
انہوں نے چولستان جیپ ریلی کے شرکاء کو مبارکباد دیتے ہوئے کہا کہ اس ایونٹ میں دیگر ممالک کے ڈرائیورز نے بھی شرکت کی جو اس کی بین الاقوامی اہمیت کو ظاہر کرتا ہے، ایسے مقامی میلوں اور ثقافتی سرگرمیوں سے روزگار کے مواقع بھی بڑھتے ہیں۔
مریم اورنگزیب کا کہنا تھا کہ نواز شریف کو اپنی ثقافت، ورثے اور چولستان سے خاص محبت ہے اور انہوں نے اس خطے کی ترقی کیلئے نمایاں کام کیے جو سب کے سامنے ہیں، چولستان جیپ ریلی کا انعقاد اس علاقے کیلئے نہایت اہم قدم ہے۔
انہوں نے کہا کہ دراوڑ فورٹ پہلے کھنڈرات کا منظر پیش کر رہا تھا تاہم اب وہاں بہترین کام کروایا جا رہا ہے، وزیراعلیٰ پوری دنیا کیلئے سیاحت کے دروازے کھول رہی ہیں اور ان کے وژن کے مطابق تمام تاریخی مقامات کو بحال کیا جائے گا۔
صوبائی وزیر کا مزید کہنا تھا کہ نوجوان نسل انٹرنیٹ پر دیگر ممالک کی ثقافت دیکھتی ہے تاہم بسنت کے تین دن نوجوان اپنی ثقافت سے جڑے رہے، پنجاب حکومت عوام کو ان کی ثقافت واپس لوٹا رہی ہے۔
انہوں نے شرکاء کو بتایا کہ اگلے سال چولستان جیپ ریلی میں وزیراعلیٰ مریم نواز خود آئیں گی، چولستان اوردراوڑ کے عوام کے ساتھ مل کر اس فیسٹیول کو کامیاب بنایا گیا، فیصل حسن شادی خیل کے جذبات کو سمجھتی ہوں، فیصل حسن شادی خیل نے بدقسمت حادثے کے بعد ریس میں حصہ نہیں لیا۔
صوبائی وزیر نے کہا کہ چولستان جیپ ریلی میں اے ایس آئی شہید ہوئے، ان کو خراج تحسین پیش کرتے ہیں، جیپ ریلی میں حصہ لینے والوں کیلئے قانون سازی کا عمل شروع ہوچکا ہے، آئندہ جو بھی جیپ ریلی میں شرکت کرے گا اس کو بالکل تحفظ دیا جائے گا۔
مزید برآں، مریم اورنگزیب اک کہنا تھا کہ پہلی بار ٹورازم اتھارٹی قائم کی گئی ہے تاکہ سیاحت کے شعبے کو منظم انداز میں فروغ دیا جا سکے، پورے محکمہ ٹورازم کو وزیراعلیٰ مریم نواز کی جانب سے شاباش دیتی ہوں، وزیراعلیٰ مریم نواز نے پنجاب کی رونقیں دوبارہ بحال کردیں ہیں۔
