پیر 16 فروری 2026 
لاہور:(نیوزڈیسک) شوکت خانم اسپتال کے ڈاکٹر عاصم یوسف نے کہا ہے کہ جب تک وہ خود بانی پی ٹی آئی عمران خان کا معائنہ نہیں کر لیتے۔ حتمی رائے دینا ممکن نہیں۔
شوکت خانم میموریل اسپتال کے ڈاکٹر عاصم یوسف نے کہا ہے کہ گزشتہ شب پونے 10 بجے بانی پی ٹی آئی عمران خان کا طبی معائنہ کرنے والی اسلام آباد کی میڈیکل ٹیم سے ان کی تفصیلی بات چیت ہوئی۔
ڈاکٹر عاصم یوسف نے کہا کہ لاہور سے ڈاکٹر خرم اعظم بھی اس مشاورت میں ان کے ہمراہ تھے۔ انہوں نے بتایا کہ اسلام آباد میں موجود ڈاکٹروں کے ساتھ تقریباً 40 منٹ تک گفتگو ہوئی جس میں بانی پی ٹی آئی کی صحت سے متعلق امور زیر بحث آئے۔
انہوں نے کہا کہ اسلام آباد کے ڈاکٹروں کے مطابق بانی پی ٹی آئی کی طبیعت میں کافی بہتری آ چکی ہے۔ تاہم وہ اس رپورٹ کو نہ مسترد کر سکتے ہیں اور نہ ہی مکمل طور پر قبول کر سکتے ہیں۔
ڈاکٹر عاصم یوسف نے واضح کیا کہ جب تک وہ خود بانی پی ٹی آئی کا معائنہ نہیں کر لیتے، حتمی رائے دینا ممکن نہیں۔ انہوں نے درخواست کی کہ انہیں بانی پی ٹی آئی کا براہ راست چیک اپ کرنے کی اجازت دی جائے تاکہ وہ ذاتی طور پر طبی صورتحال کا جائزہ لے سکیں۔
