پیپلز پارٹی پنجاب میں شدید اختلافات، زرداری لاہور پہنچ گئے

لاہور:(نیوزڈیسک) پیپلز پارٹی پنجاب تنظیم میں اختلافات شدت اختیار کر گئے۔
پنجاب حکومت سے معاہدوں پر پیش رفت نہ ہونے پر پارٹی رہنماؤں کے شدید تحفظات سامنے آئے ہیں، جیالوں کا کہنا ہے کہ اتحادی ہونے کے باوجود پنجاب حکومت ہمیں منہ نہیں لگا رہی۔

متعدد اجلاس بے نتیجہ ختم ہوئے اور تنظیمی بحران برقرارہے، پیپلز پارٹی پنجاب کے رہنماؤں ا پنے اعتراضات میں حکومت سے وعدے وفا نہ ہونے کا شکوہ کرتے نظر آرہے ہیں جب کہ صوبائی سطح پر تنظیمی ڈھانچے اور سیاسی حکمت عملی پر سوالات اٹھ گئے۔

پنجاب میں پارٹی کو فعال نہ کرنے پر قیادت پر دباؤ بڑھ گیا، صدر آصف علی زرداری اختلافات سُلجھانے لاہور پہنچ گئے وہ دو روز لاہور میں قیام کریں گے اور اعلیٰ شخصیات سے اہم ملاقاتیں کریں گے،بلاول ہاؤس لاہور سیاسی سرگرمیوں کا مرکز ہوگا۔

دوسری جانب پنجاب حکومت کے ساتھ اتحادی معاملات کا ازسرنو جائزہ لیا جائے گا، تنظیمی معاملات بہتر بنانے کیلئے اہم فیصلوں کا بھی امکان ہے، ناراض رہنماؤں کو اعتماد میں لینے کیلئے مشاورتی اجلاس طلب کرلیا۔

دوسری جانب یہ بھی کہا جارہا ہے کہ کیا پیپلز پارٹی پنجاب میں نئی حکمت عملی اپنائے گی؟، صدر مملکت کے لاہور میں ڈیرے سے پنجاب کی سیاست میں نئی ہلچل کا امکان ہے ۔