بدھ 18 فروری 2026 
کراچی(نیوز ڈیسک) کراچی کے مختلف علاقوں میں رات گئے پولیس نے مبینہ مقابلوں کے بعد چھ زخمیوں سمیت سات ملزمان کو گرفتار کر لیا۔
سائٹ سپر ہائی وے پولیس نے چند گھنٹوں میں مقابلے کے بعد شہری کو زخمی کر کے موٹر سائیکل چھینے والے ملزم کو زخمی حالت میں گرفتار کر کے اس کے قبضے سے اسلحہ، مسروقہ سامان اور چھینی ہوئی موٹر سائیکل برآمد کر لی۔
پاپوش نگر پولیس نے مقابلے کے دوران ملزم کو زخمی حالت میں گرفتار کر کے اسلحہ اور چھینا ہوا سامان برآمد کر لیا، ادھر گلبرگ پولیس نے طاہر ولا چورنگی کے قریب مبینہ فائرنگ کے تبادلے کے بعد ایک ملزم کو زخمی حالت میں گرفتار کر لیا، ملزم کے قبضے سے اسلحہ برآمد کیا گیا۔
خواجہ اجمیر نگری پولیس نے جمعرات بازار کے قریب مبینہ مقابلے کے بعد ایک ملزم کو زخمی حالت میں گرفتار کر کے اسلحہ اور موبائل فونز برآمد کر لئے گئے۔
موچکو پولیس اور ملزمان کے درمیان فائرنگ کے تبادلے کے بعد ایک زخمی سمیت دو ملزمان کو گرفتار کر کے ان کے قبضے سے اسلحہ، مسروقہ سامان اور موٹر سائیکل برآمد کر لی۔
قائد آباد پولیس نے مبینہ فائرنگ کے تبادلے کے بعد ایک ملزم کو زخمی حالت میں گرفتار ساتھی رات کی تاریکی کا فائدہ اٹھاتے ہوئے فرار ہونے میں کامیاب ہو گیا، ملزم کے قبضے سے اسلحہ، موبائل فونز اور موٹر سائیکل برآمد کر لی۔
پولیس نے گرفتار ملزمان کے خلاف مقدمات درج کر کے مزید قانونی کارروائی کا آغاز کر دیا گیا۔
