جمعرات 19 فروری 2026 
پاکستانی شوبز انڈسٹری کی معروف سینئر اداکارہ صبا فیصل کی رمضان روٹین نے سوشل میڈیا پر ایک نئی بحث چھیڑ دی۔
حال ہی میں اداکارہ نے نجی ٹی وی چینل کی رمضان اسپیشل ٹرانسمیشن میں بطور مہمان شرکت کی جہاں انہوں نے ساتھی مہمانوں کے ہمراہ افطار کی تیاریوں کے حوالے سے گفتگو کی۔
رمضان المبارک میں فروٹ چاٹ کو ایک مقبول اسنیک سمجھا جاتا ہے اور صبا فیصل اسے تیار کرنے کا اپنا ایک منفرد انداز رکھتی ہیں، جس کے لیے انہوں نے باقاعدہ وقت بھی مقرر کر رکھا ہے۔
دورانِ انٹرویو سینئر اداکارہ نے فروٹ چاٹ بنانے کے حوالے سے اپنی رائے کا اظہار کرتے ہوئے کہا کہ میں رمضان میں دوپہر 12 بجے فروٹ چاٹ میں چاٹ مصالحہ شامل کر کے اسے تیار کر لیتی ہوں اور پھر اسے ایئر ٹائٹ باکس میں محفوظ کر دیتی ہوں، یوں میں افطار سے کئی گھنٹے قبل ہی اپنی فروٹ چاٹ تیار کر لیتی ہوں۔
مگر ان کے اس انکشاف پر سوشل میڈیا صارفین کی جانب سے مختلف ردِعمل سامنے آ رہے ہیں اور ایک نئی بحث چھڑ گئی ہے۔
صارفین نے ان کے فروٹ چاٹ بنانے کے وقت پر اعتراض کیا ہے، ایک صارف نے طنزیہ انداز میں لکھا ہے کہ ’سحری میں ہی بنا کر رکھ دیا کریں۔‘
دوسرے صارف کا کہنا ہے کہ ’ان کے فروٹ کالے بھی نہیں ہوتے‘۔
ایک اور صارف کا کہنا ہے کہ ’ان کی باتوں سے ایسا لگتا ہے یہ 200 سال پرانی خاتون ہیں۔‘
