پیر 2 مارچ 2026 
دبئی (نیوز ڈیسک) بالی ووڈ اداکارہ نرگس فخری نے ایران اور امریکا کے درمیان بڑھتی ہوئی کشیدگی کے دوران دبئی میں قیام کے دوران اپنی ذہنی کیفیت اور خوف کے احساسات کا اظہار کیا ہے۔ اداکارہ نے سوشل میڈیا پر متعدد پوسٹس شیئر کرتے ہوئے بتایا کہ وہ صورتحال کے باعث شدید بے چینی کا شکار رہیں اور نیند بھی پوری نہ ہو سکی۔
نرگس فخری نے ایک پوسٹ میں اپنے فلیٹ کی بالکونی سے رات کا منظر دکھایا اور لکھا کہ
“چاہے کچھ بھی ہو، دل میں بے چینی اور خوف کی کیفیت ختم نہیں ہو رہی کیونکہ یہ معلوم نہیں کہ آگے کیا ہونے والا ہے۔ نیند آنا مشکل ہو گیا ہے اور دماغ مسلسل الرٹ رہتا ہے۔ کافی رات ہو چکی ہے لیکن میں جاگ رہی ہوں۔”
ذرائع کے مطابق نرگس فخری دو روز تک دبئی میں مقیم رہیں، جہاں سیٹلائٹ تصاویر میں بعض علاقوں میں دھویں کے بادل دیکھے گئے، جو ایران کی جانب سے میزائل اور ڈرون حملوں کے بعد ظاہر ہوئے۔ اداکارہ نے اپنی رہائش گاہ سے لی گئی تصاویر بھی شیئر کیں اور صورتحال کو “انتہائی غیر معمولی اور خوفناک” قرار دیا۔
تاہم خوف اور بے چینی کے باوجود نرگس فخری نے مقامی حکام کی کارکردگی کو سراہتے ہوئے کہا کہ عوام کے تحفظ کے لیے حفاظتی ادارے مؤثر اقدامات کر رہے ہیں۔ انہوں نے ایک ویڈیو ری پوسٹ کرتے ہوئے لکھا کہ
“واقعی یہ لوگ بہترین کام کر رہے ہیں۔”
خبر رساں اداروں کے مطابق 24 فروری کو دبئی کی فضاء صاف دکھائی دے رہی تھی، تاہم یکم مارچ کو سامنے آنے والی سیٹلائٹ تصاویر میں ساحلی اور لاجسٹک علاقوں کے قریب دھواں اٹھتا ہوا دیکھا گیا، جس سے کشیدگی کی شدت کا اندازہ ہوتا ہے۔
نرگس فخری کی ذاتی زندگی کے حوالے سے بتایا گیا ہے کہ انہوں نے گزشتہ برس کیلیفورنیا میں ایک نجی تقریب میں ٹونی بیگ سے شادی کی تھی۔ فلمی کیریئر کے حوالے سے وہ حال ہی میں فلم Housefull 5 میں نظر آئیں، جبکہ اس سے قبل وہ فلم Azhar میں بھی اپنی اداکاری کے جوہر دکھا چکی ہیں۔
اداکارہ کے اس بیان کے بعد سوشل میڈیا پر مداحوں کی جانب سے ان کے لیے خیرسگالی کے پیغامات سامنے آ رہے ہیں اور عالمی حالات پر تشویش کا اظہار بھی کیا جا رہا ہے۔
