جمعرات 5 مارچ 2026 
پاکستانی کرکٹر عماد وسیم کی سوشل میڈیا پوسٹ کے جواب میں ان کی سابق اہلیہ ثانیہ اشفاق نے اپنی پوسٹ میں تلخ جملوں کا استعمال کیا ہے۔
پاکستانی کرکٹر عماد وسیم اور ان کی سابق اہلیہ ثانیہ اشفاق کے درمیان سوشل میڈیا پر ایک بار پھر تلخ جملوں کا تبادلہ دیکھنے میں آیا ہے، دونوں نے 6 سالہ ازدواجی زندگی کے بعد حال ہی میں علیحدگی اختیار کر لی تھی۔
رپورٹس کے مطابق ثانیہ اشفاق اس وقت اپنے 3 بچوں کی تنہا پرورش کر رہی ہیں اور ان کا کہنا ہے کہ بچوں کو ان کے والد کی جانب سے نظر انداز کیا جا رہا ہے۔
حال ہی میں عماد وسیم نے اپنی بیٹی عنایہ کی سالگرہ کے موقع پر سوشل میڈیا پر ایک تصویر شیئر کرتے ہوئے لکھا کہ میری بیٹی کو سالگرہ مبارک، بابا تم سے بہت محبت کرتے ہیں۔
اس پوسٹ کے جواب میں ثانیہ اشفاق نے بھی اپنی بیٹی کو سالگرہ کی مبارک باد دیتے ہوئے سخت الفاظ میں ردِعمل دیا ہے۔
View this post on Instagram
انہوں نے لکھا ہے کہ میری خوبصورت بیٹی کو پانچویں سالگرہ مبارک، تم ایک ایسے بچپن کی حق دار ہو جو محبت، تحفظ اور استحکام سے بھرا ہو، یہ دیکھنا تکلیف دہ ہے کہ سوشل میڈیا پر بابا تم سے بہت محبت کرتے ہیں جیسے پیغامات دیے جاتے ہیں، جبکہ نجی طور پر اداروں کو کہا جا رہا ہے کہ بچوں اور ان کی ماں کو بے گھروں کی پناہ گاہ میں بھیج دیا جائے کیونکہ مالی مدد بند کی جا رہی ہے۔
ثانیہ اشفاق نے مزید لکھا ہے کہ بچوں کو صرف سوشل میڈیا پر کہے گئے الفاظ نہیں بلکہ حقیقی زندگی میں تحفظ، سچائی اور ذمے داری کی ضرورت ہوتی ہے، چاہے کچھ بھی ہو، ماں ہمیشہ تمہاری حفاظت کرے گی اور تمہیں ہر دن محفوظ اور محبت بھرا احساس دلائے گی۔
سوشل میڈیا پر اس معاملے کے بعد صارفین کی بڑی تعداد ثانیہ اشفاق کے حق میں سامنے آ گئی، متعدد صارفین نے ان کی بیٹی عنایہ کو سالگرہ کی مبارک باد دی اور ثانیہ اشفاق کی ہمت کی تعریف کی ہے۔
