پی ایس ایل میچز کے دوران پولیس کی سستی پر چیف جسٹس لاہور ہائیکورٹ برہم

لاہور ہائیکورٹ کی چیف جسٹس عالیہ نیلم نے پی ایس ایل میچز کے دوران سڑکیں بند کرنے اور فراڈ کے ملزم کو عدالت میں پیش نہ کرنے پر شدید برہمی کا اظہار کیا ہے۔
لاہور ہائیکورٹ میں فراڈ کے ملزم علی امیر کی درخواست ضمانت کی سماعت کے دوران چیف جسٹس نے استفسار کیا کہ “پولیس نے ملزم کو عدالت میں کیوں پیش نہیں کیا؟ پی ایس ایل میچز کی وجہ سے پولیس کی عیاشیاں شروع ہو گئی ہیں۔”
عدالت نے معاملے کی سنجیدگی کے پیش نظر چیف سیکرٹری پنجاب اور ہوم سیکرٹری کو فوری طلب کر لیا۔
ملزم کے خلاف لیاقت آباد میں درج مقدمے میں مدعی کی 4 کروڑ روپے کی پراپرٹی ہتھیا لینے کا الزام ہے۔ وکیل مدعی اعجاز بھٹی نے عدالت کو بتایا کہ پی ایس ایل میچز کی وجہ سے سیکیورٹی بنیاد پر ملزم کو عدالت پیش نہیں کیا جا رہا، جس کے باعث ٹرائل میں تاخیر ہو رہی ہے۔
درخواست گزار کی جانب سے استدعا کی گئی کہ عدالت ملزم کی رہائی کی درخواست ضمانت منظور کرے تاکہ کیس کی قانونی کارروائی بغیر رکاوٹ جاری رہ سکے۔