عطا تارڑ: کوئی سیاسی جماعت یا شخصیت ملک سے بالا تر نہیں

وفاقی وزیر اطلاعات و نشریات عطاء اللہ تارڑ نے کہا ہے کہ موجودہ مشرق وسطیٰ کی کشیدہ صورتحال میں پاکستان کا کلیدی کردار دنیا بھر میں تسلیم کیا جا رہا ہے۔
اسلام آباد میں پریس کانفرنس کے دوران انہوں نے کہا کہ وزیرِ اعظم شہباز شریف اور فیلڈ مارشل سید عاصم منیر نے سفارتی محاذ پر پاکستان کی کامیابی کو یقینی بنایا، اور ہمسایہ ملک بھارت بھی اس سے پریشان ہے۔
عطاء اللہ تارڑ نے مزید کہا کہ پاکستان نے عالمی سطح پر موثر اور بھرپور آواز قائم کی ہے، جیسا کہ جنیوا اجلاس میں دیکھا گیا۔ ان کے مطابق، کوئی سیاسی لیڈر یا جماعت ملک سے بڑا نہیں ہے۔ تنقید کا حق سب کو حاصل ہے، لیکن قومی وقار کو داؤ پر لگانا ناقابل قبول ہے۔
وزیر اطلاعات نے زور دیا کہ سیاسی اختلافات میں بھی ملک کی تضحیک برداشت نہیں کی جا سکتی۔ انہوں نے کہا کہ موجودہ عالمی حالات میں پاکستان کے خلاف پروپیگنڈا ناقابل قبول ہے، اور شخصیت پرستی یا ذاتی مفادات ملک کو نقصان پہنچا سکتے ہیں۔ انہوں نے واضح کیا کہ ملک کے خلاف بات کرنے والوں کو شرم آنی چاہیے، اور قومی مفاد ہمیشہ سب سے مقدم ہے۔