پیر 6 اکتوبر 2025 
بیجنگ ( نیوزڈیسک)چین نے ایک جدید ڈرون مدر شپ متعارف کروا دی ہے جو بیک وقت 100 ڈرون فضا میں چھوڑنے کی صلاحیت رکھتی ہے۔ دفاعی ماہرین کا کہنا ہے کہ یہ پیش رفت جنگی حکمتِ عملی میں انقلابی تبدیلی کا سبب بن سکتی ہے۔
چینی میڈیا کے مطابق اس مدر شپ کو طویل فاصلے کی پرواز، بھاری پے لوڈ اور بڑے پیمانے پر ڈرون سوارمز کی تعیناتی کے لیے ڈیزائن کیا گیا ہے۔ ماہرین کے خیال میں اس ٹیکنالوجی کا استعمال دفاعی اور حملہ آور دونوں مقاصد کے لیے کیا جا سکتا ہے، جس سے عالمی طاقتوں کے درمیان دفاعی مقابلہ مزید تیز ہونے کا امکان ہے۔
تجزیہ کاروں نے کہا ہے کہ ڈرون سوارمز کی یہ نئی صلاحیت دشمن کے دفاعی نظام کو مفلوج کرنے اور میدانِ جنگ میں مؤثر نتائج دینے کی طاقت رکھتی ہے۔ تاہم، کچھ حلقوں نے اس کے ممکنہ خطرات پر بھی تشویش ظاہر کی ہے، کیونکہ بڑے مدر شپ پلیٹ فارمز جدید دفاعی شیلڈز اور کاؤنٹر ٹیکنالوجیز کے سامنے کمزور ثابت ہو سکتے ہیں۔
دفاعی مبصرین کا کہنا ہے کہ چین کی اس پیش رفت کے بعد خطے میں اسلحہ کی دوڑ مزید تیز ہو گی اور نئی حکمتِ عملی کے تحت عسکری توازن میں بڑی تبدیلیاں دیکھنے کو ملیں گی۔
