حوثیوں کا اسرائیل پر پہلا میزائل حملہ، جنوبی علاقوں میں سائرن بج اٹھے

اسرائیلی دفاعی افواج (IDF) نے تصدیق کی ہے کہ ہفتے کی صبح یمن سے اسرائیل کی جانب ایک میزائل داغا گیا، جس کے بعد جنوبی علاقوں میں خطرے کے سائرن بج اٹھے۔
میڈیا رپورٹس کے مطابق حوثی تحریک کی جانب سے یہ حملہ ایران پر امریکی اور اسرائیلی کارروائیوں کے آغاز کے بعد پہلا میزائل حملہ ہے، جس نے خطے میں کشیدگی کو مزید بڑھا دیا ہے۔
اسرائیلی فوج کے مطابق میزائل کے خطرے کے پیش نظر فضائی دفاعی نظام کو فوری طور پر فعال کیا گیا، جبکہ نیگیو کے علاقے میں واقع شہر بیر شیبہ اور اس کے گرد و نواح میں سائرن بجائے گئے۔
حکام نے شہریوں کو ہدایت کی کہ وہ ہوم فرنٹ کمانڈ کی جانب سے جاری کردہ حفاظتی اقدامات پر عمل کریں تاکہ کسی بھی ممکنہ خطرے سے بچا جا سکے۔
یہ میزائل جنوبی اسرائیل کی طرف داغا گیا، جس کے بعد بیر شیبہ اور قریبی علاقوں میں ہائی الرٹ جاری کر دیا گیا، جبکہ ایلات میں بھی ممکنہ خطرے کے پیش نظر ابتدائی وارننگ دی گئی۔
ابتدائی اطلاعات کے مطابق اس حملے میں کسی جانی یا بڑے مالی نقصان کی فوری اطلاع سامنے نہیں آئی۔
واضح رہے کہ حوثی گروہ، جسے ایران کی حمایت حاصل ہے، ماضی میں بھی خطے میں اسرائیل کے خلاف کارروائیاں کر چکا ہے، تاہم حالیہ کشیدگی کے آغاز کے بعد یمن سے اسرائیل پر یہ پہلا تصدیق شدہ میزائل حملہ قرار دیا جا رہا ہے۔