ایران کے صوبہ زنجان پر امریکی-اسرائیلی حملہ، 5 شہری شہید

ایران کے شمال مغربی صوبہ زنجان میں امریکی اور اسرائیلی فضائی حملے کے نتیجے میں پانچ شہری جاں بحق اور سات دیگر زخمی ہو گئے ہیں۔
فارس نیوز ایجنسی کے مطابق زنجان کے ڈپٹی گورنر علی صادقی نے بتایا کہ شہادتیں اُس وقت ہوئیں جب ایک رہائشی عمارت کو حملے میں نشانہ بنایا گیا۔ زخمیوں کو فوری طور پر قریبی اسپتال منتقل کر دیا گیا ہے، جہاں ان کا علاج جاری ہے۔
حملے کے بعد ایران نے امریکی اور اسرائیلی اقدامات کے جواب میں اپنی فوجی کارروائی شروع کی، جس میں اسرائیل، اردن، عراق اور خلیجی ممالک میں ڈرون اور میزائل حملوں کی لہر شامل تھی۔ اطلاعات کے مطابق ایران نے خلیجی ممالک میں موجود امریکی فوجی اڈوں کو بھی ہدف بنایا۔
یہ واقعہ خطے میں تناؤ اور کشیدگی کو مزید بڑھا سکتا ہے، جبکہ بین الاقوامی برادری کی جانب سے بھی تشویش کا اظہار کیا جا رہا ہے۔