پاکستان میں سونے کی قیمتوں میں دوبارہ اضافہ، مارکیٹ میں نئی بلند سطح قائم

پاکستان بھر کی صرافہ مارکیٹوں میں آج سونے کی قیمتوں میں ایک بار پھر نمایاں اضافہ دیکھنے میں آیا ہے، جس کے بعد خریداروں کیلئے سونا مزید مہنگا ہو گیا ہے۔
آل پاکستان صرافہ جیمز اینڈ جیولرز ایسوسی ایشن کے مطابق فی تولہ سونے کی قیمت میں 4 ہزار 800 روپے کا اضافہ ہوا ہے، جس کے بعد نئی قیمت 4 لاکھ 72 ہزار 62 روپے تک پہنچ گئی ہے۔
اسی طرح 10 گرام سونے کی قیمت بھی 4 ہزار 116 روپے بڑھ کر 4 لاکھ 4 ہزار 717 روپے ہو گئی ہے، جو حالیہ دنوں کی بلند ترین سطحوں میں شمار کی جا رہی ہے۔
دوسری جانب عالمی مارکیٹ میں بھی سونے کی قیمتوں میں اضافہ ریکارڈ کیا گیا، جہاں فی اونس سونا 48 ڈالر مہنگا ہو کر 4493 ڈالر تک جا پہنچا ہے۔
یاد رہے کہ اس سے قبل گزشتہ روز سونے کی قیمت میں معمولی کمی دیکھی گئی تھی، تاہم آج کے اضافے نے ایک بار پھر مارکیٹ کا رخ بدل دیا ہے۔ ماہرین کے مطابق عالمی قیمتوں میں اتار چڑھاؤ اور معاشی غیر یقینی صورتحال سونے کی قیمتوں پر براہِ راست اثر انداز ہو رہی ہے۔