ہفتہ 28 مارچ 2026 
واشنگٹن(ویب ڈیسک) امریکی صدر ڈونلڈ ٹرمپ نے انکشاف کیا ہے کہ ایران نے امریکی طیارہ بردار بحری جہاز یو ایس ایس جیرالڈ آر فورڈ کو نشانہ بنایا، اور دعویٰ کیا کہ اس حملے میں جہاز کو 17 مختلف زاویوں سے ٹارگٹ کیا گیا۔
صدر ٹرمپ کے مطابق حملہ نہایت شدید نوعیت کا تھا، جس کے باعث جہاز پر موجود عملے کو اپنی جانیں بچانے کے لیے فوری اقدامات کرنا پڑے۔ انہوں نے بتایا کہ رات کے وقت صورتحال انتہائی کشیدہ رہی اور تقریباً ہر 32 سیکنڈ بعد جنگی طیارے جہاز سے اڑان بھر رہے تھے۔
ان کا کہنا تھا کہ حملے سے قبل غیر معمولی سرگرمیوں نے پہلے ہی خطرے کی نشاندہی کر دی تھی، جس کے بعد سیکیورٹی مزید سخت کر دی گئی تھی۔
دوسری جانب امریکی بحریہ نے اپنے ایک اور طیارہ بردار جہاز یو ایس ایس جارج ایچ ڈبلیو بش کو ناروک سے مشرق وسطیٰ کی جانب روانہ کر دیا ہے۔ یہ بحری بیڑا خطے میں پہلے سے موجود یو ایس ایس جیرالڈ آر فورڈ اور یو ایس ایس ابراہم لنکن کے ساتھ شامل ہو سکتا ہے۔
اس پیش رفت کے بعد مشرق وسطیٰ میں امریکی طیارہ بردار جہازوں کی تعداد تین ہو جائے گی۔ ذرائع کے مطابق متاثرہ بحری جہاز کو مرمت کے لیے کریٹ کے قریب لنگر انداز کیا گیا ہے، جبکہ تیسرے بیڑے کی تعیناتی کا مقصد خطے میں امریکی عسکری صلاحیت کو مزید مضبوط بنانا ہے۔
یہ تمام اقدامات اس بات کی نشاندہی کرتے ہیں کہ خطے میں کشیدگی بدستور برقرار ہے اور حالات کسی بھی وقت مزید سنجیدہ رخ اختیار کر سکتے ہیں۔
