پیر 13 اپریل 2026 
وزیراعظم محمد شہباز شریف (Prime Minister Muhammad Shehbaz Sharif) کی زیر صدارت ملک میں پٹرولیم مصنوعات کے ذخائر اور کھپت سے متعلق ایک اہم اجلاس منعقد ہوا، جس میں خطے میں بڑھتی ہوئی کشیدگی کے تناظر میں صورتحال کا تفصیلی جائزہ لیا گیا۔
اجلاس کے دوران وزیراعظم نے ہدایت کی کہ ملک میں تیل کی کھپت اور ذخائر کی مسلسل نگرانی جاری رکھی جائے تاکہ کسی بھی ممکنہ صورتحال سے بروقت نمٹا جا سکے۔
بریفنگ میں بتایا گیا کہ مؤثر حکمت عملی اور مسلسل نگرانی کے باعث، خطے میں کشیدگی کے باوجود ملک میں تیل کی کسی قسم کی قلت پیدا نہیں ہوئی۔ حکام نے یقین دلایا کہ اس وقت ملک میں پٹرولیم مصنوعات کے مناسب ذخائر موجود ہیں۔
مزید پڑھیں:ناکہ بندی کے قریب آنے والے کسی بھی بحری جہاز کو تباہ کردیا جائے گا: ٹرمپ
وزیراعظم نے اس موقع پر کہا کہ عوام کو ریلیف فراہم کرنے کے لیے جو اقدامات کیے گئے ہیں، وہ بدستور جاری رہیں گے۔ انہوں نے اس بات پر بھی زور دیا کہ توانائی کے وسائل کے مؤثر استعمال کے لیے کفایت شعاری کو فروغ دینا ضروری ہے۔
اجلاس میں مزید بتایا گیا کہ مستقبل کی ضروریات کو مدنظر رکھتے ہوئے تیل کی درآمد کے انتظامات بھی مکمل کر لیے گئے ہیں، تاکہ سپلائی میں کسی قسم کا خلل نہ آئے۔
اس اہم اجلاس میں نائب وزیراعظم و وزیر خارجہ محمد اسحاق ڈار، وفاقی وزیر اقتصادی امور احد چیمہ، وزیر پیٹرولیم علی پرویز ملک، وفاقی وزیر اطلاعات و نشریات عطا اللہ تارڑ سمیت متعلقہ اداروں کے اعلیٰ حکام نے شرکت کی۔
