ہفتہ 25 اپریل 2026 
راولپنڈی کے علاقے وارث خان (Waris Khan) میں بازار جانے کے لیے گھر سے نکلنے والی ایک لڑکی کے اغوا اور مبینہ جنسی زیادتی کا افسوسناک واقعہ سامنے آیا ہے۔
پولیس کے مطابق متاثرہ لڑکی آریہ محلہ کرسچن کالونی سے بازار جا رہی تھی کہ راستے میں چند افراد نے اسے مبینہ طور پر اغوا کر لیا۔ الزام ہے کہ لڑکی کو پوری رات یرغمال بنا کر زیادتی کا نشانہ بنایا گیا۔
اطلاعات کے مطابق ملزمان لڑکی کو صبح سویرے گھر کے باہر چھوڑ کر فرار ہو گئے۔ واقعے کے بعد متاثرہ لڑکی کی والدہ کی مدعیت میں تھانہ وارث خان میں مقدمہ درج کر لیا گیا ہے۔
درخواست میں زیدی اور غنی نامی دو ملزمان کو نامزد کیا گیا ہے، جبکہ پولیس کا کہنا ہے کہ واقعے کی تحقیقات شروع کر دی گئی ہیں اور ملزمان کی گرفتاری کے لیے کارروائی جاری ہے۔
یہ واقعہ علاقے میں شدید تشویش کا باعث بنا ہے، جبکہ اہلِ خانہ نے فوری انصاف اور ملزمان کو قانون کے کٹہرے میں لانے کا مطالبہ کیا ہے۔
