سعودی پاک جوائنٹ بزنس کونسل کے وفد کی وزیراعلیٰ پنجاب سے ملاقات

لاہور: سعودی پاک جوائنٹ بزنس کونسل کا ایک خصوصی وفد لاہور پہنچ گیا، جہاں وزیراعلیٰ پنجاب مریم نواز شریف نے ایئرپورٹ پر جا کر وفد کا پرتپاک خیر مقدم کیا۔ وفد کی قیادت پاک سعودی بزنس فورم کے چیئرمین شہزادہ منصور بن محمد بن سعاد آل سعود نے کی۔

وزیراعلیٰ مریم نواز شریف نے سعودی وفد سے ملاقات کی اور اس موقع پر خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان بن عبدالعزیز کے لیے عقیدت و احترام کا اظہار کیا۔ انہوں نے سعودی عرب کے ساتھ گہرے برادرانہ تعلقات کی اہمیت پر زور دیا اور دوطرفہ تجارت و سرمایہ کاری کو مزید فروغ دینے کے عزم کا اعادہ کیا۔

ملاقات کے دوران وزیراعلیٰ نے سعودی سفیر کی جانب سے سیلاب متاثرین کے لیے گھریلو سامان کی فراہمی پر خصوصی شکریہ ادا کیا۔ انہوں نے کہا کہ سعودی عرب کی جانب سے ہر مشکل وقت میں پاکستان کے ساتھ تعاون قابل ستائش ہے۔

سعودی وفد کے سربراہ شہزادہ منصور بن محمد نے پاک سعودی جوائنٹ بزنس کونسل کے مقاصد پر روشنی ڈالی اور پاکستان میں سرمایہ کاری کے مواقع پر تبادلہ خیال کیا۔ وفد کے دورے سے دونوں ممالک کے درمیان اقتصادی تعلقات کو مزید مضبوط کرنے کی توقع کی جا رہی ہے۔

اس موقع پر دونوں فریقین نے باہمی دلچسپی کے شعبوں میں تعاون بڑھانے اور نئے منصوبوں پر کام شروع کرنے پر اتفاق کیا۔ وفد کے دورے کو پاک سعودی تعلقات میں ایک اہم سنگ میل قرار دیا جا رہا ہے۔