چین میں سندھ حکومت کے وزراء کی یوٹونگ بس کمپنی کے حکام سے ملاقات

چین میں سندھ کے سینئر وزیر شرجیل انعام میمن اور صوبائی وزیر سید ناصر حسین شاہ نے یوٹونگ بس کمپنی کے حکام سے ملاقات کی، جس میں سندھ میں ٹرانسپورٹ اور توانائی کے شعبوں میں سرمایہ کاری کے مواقع پر تفصیلی تبادلہ خیال کیا گیا۔

ملاقات کے دوران یوٹونگ حکام نے وزراء کو اپنی نئی اور جدید ماڈل بسوں کے بارے میں بریفنگ دی اور پاکستان بالخصوص سندھ میں جدید بسیں متعارف کرانے میں گہری دلچسپی کا اظہار کیا۔

شرجیل انعام میمن نے اس موقع پر کہا کہ سندھ حکومت شہریوں کو معیاری اور محفوظ ٹرانسپورٹ فراہم کرنے کے لیے پرعزم ہے۔ ان کا کہنا تھا کہ دھابیجی اسپشل اکنامک زون غیر ملکی سرمایہ کاروں کے لیے سنہری موقع ہے، جہاں سرمایہ کاروں کو دس سالہ ٹیکس چھوٹ سمیت ہر ممکن سہولیات فراہم کی جا رہی ہیں۔ انہوں نے مزید کہا کہ سندھ میں ٹرانسپورٹ کے شعبے میں بڑے پیمانے پر اصلاحات کی ضرورت ہے اور کراچی سمیت صوبے کے دیگر شہروں میں معیاری بس سروس فراہم کرنا حکومت کی اولین ترجیح ہے۔

سید ناصر حسین شاہ نے کہا کہ سندھ حکومت چاہتی ہے کہ ماحول دوست اور توانائی کے متبادل ذرائع پر مبنی پبلک ٹرانسپورٹ متعارف کرائی جائے۔ ان کے مطابق یوٹونگ بسیں ان مقاصد کے لیے بہترین آپشن ثابت ہو سکتی ہیں۔ انہوں نے یقین دہانی کرائی کہ سندھ حکومت شفاف سرمایہ کاری کے لیے ہر ممکن تعاون کرے گی اور سرمایہ کاروں کو پائیدار کاروباری ماحول فراہم کیا جائے گا۔