سزاؤں کا اتوار بازار ختم ہونا چاہیے، عدلیہ انصاف ہوتا ہوا دکھائے، بیرسٹرگوہر، عمرایوب

پشاور: پاکستان تحریک انصاف کے چیئرمین بیرسٹر گوہر نے کہا ہے کہ چیف جسٹس سے درخواست ہے کہ ہمارے زیر التوا مقدمات پر قانون کے مطابق کارروائی کریں۔ اگر عدلیہ ماتحت عدالتوں پر نظر رکھتی تو ہمارے تین لوگوں کو سو سال کی سزا نہ ہوتی۔ اب سزاؤں کا اتوار بازار ختم ہونا چاہیے، کیونکہ نفرتوں کے ساتھ حکومت کرنے سے پاکستان کو نقصان پہنچے گا۔

پشاور ہائیکورٹ کے باہر میڈیا سے گفتگو کرتے ہوئے انہوں نے کہا کہ آج عمر ایوب، شبلی فراز اور عبدالطیف کی نااہلی سے متعلق درخواستوں کی سماعت تھی، لیکن ان مقدمات میں الیکشن کمیشن نے غیر قانونی طور پر نااہل کیا ہے۔ عدالت سے استدعا کی ہے کہ کل ہی سماعت کرلی جائے۔

بیرسٹر گوہر نے کہا کہ عدلیہ سے ہمیں امید ہے اور چاہتے ہیں کہ ریلیف اور انصاف ہوتا ہوا نظر آنا چاہیے۔ انہوں نے کہا کہ کل اسلام آباد ہائیکورٹ کے جسٹس طارق جہانگیری کے ساتھ جو کچھ ہوا، وہ افسوسناک ہے۔

چیئرمین پی ٹی آئی کا مزید کہنا تھا کہ کسی بھی جج کو عدالتی امور سے روکا نہیں جا سکتا۔ عوام کا پہلے ہی عدلیہ سے کافی اعتماد اٹھ چکا ہے، اس لیے سپریم کورٹ کو اس معاملے میں ایکشن لینا چاہیے۔ انہوں نے مطالبہ کیا کہ اسلام آباد ہائیکورٹ میں بانی پی ٹی آئی عمران خان کے کریمنل کیسز جلد از جلد سنے جائیں۔