پاکستان کا اعلیٰ سطح وفد افغان طالبان سے مذاکرات کیلئے دوحہ پہنچ گیا

اسلام آباد (نیوز ڈیسک)پاکستان کا ایک اعلیٰ سطحی وفد دوحہ پہنچ گیا ہے جہاں وہ افغان طالبان حکام کے ساتھ اہم مذاکرات کرے گا۔ دفترِ خارجہ کے مطابق وفد کی قیادت وزیرِ دفاع خواجہ آصف کر رہے ہیں۔ترجمان دفترِ خارجہ نے بتایا کہ مذاکرات میں سرحد پار دہشتگردی کے فوری خاتمے پر بات چیت کی جائے گی۔ ترجمان کے مطابق پاکستان کا مقصد کسی قسم کی کشیدگی نہیں بلکہ خطے میں پائیدار امن اور استحکام کو فروغ دینا ہے۔دفترِ خارجہ نے کہا کہ پاکستان نے افغان طالبان سے عالمی وعدوں کی پاسداری اور دہشتگرد تنظیموں کے خلاف قابلِ تصدیق کارروائی کا مطالبہ کیا ہے۔ پاکستانی وفد نے تحریکِ طالبان پاکستان (ٹی ٹی پی)، بلوچ لبریشن آرمی (بی ایل اے) اور دیگر تنظیموں کے خلاف موثر اقدامات کی ضرورت پر زور دیا ہے۔ترجمان نے مزید بتایا کہ پاکستان نے قطر کی ثالثی کی کوششوں کو سراہا ہے اور امید ظاہر کی ہے کہ یہ مذاکرات خطے میں امن و استحکام کے قیام کے لیے معاون ثابت ہوں گے۔