ہفتہ 29 اگست 2026 
دنیا کے کم عمر ترین بادشاہ کا اعزاز رکھنے والے یوگنڈا کی سلطنت تورو کے بادشاہ اویو(Oyo Nyimba Kabamba Iguru Rukidi IV) انتقال کرگئے۔
غیر ملکی میڈیا کے مطابق تورو کے وزیراعظم کیلون آرمسٹرانگ رومیئر اکیکی نے جمعے کے روز بادشاہ اویو کے انتقال کی تصدیق کی۔ بادشاہ اویو 27 اگست کو امریکا کے ایک اسپتال میں انتقال کرگئے، جہاں وہ طویل عرصے سے جاری علالت کے باعث زیرِ علاج تھے۔
تورو کے وزیراعظم نے اپنے بیان میں کہا کہ یہ شاہی خاندان، تورو کے عوام اور یوگنڈا کے لیے ناقابلِ تلافی نقصان ہے۔ انہوں نے عوام سے مشکل وقت میں متحد، پُرسکون اور دعاگو رہنے کی اپیل کی۔
بادشاہ اویو کون تھے؟
بادشاہ اویو کو گنیز ورلڈ ریکارڈ میں دنیا کے کم عمر ترین حکمران کے طور پر درج کیا گیا تھا۔ وہ 20 لاکھ سے زائد افراد پر مشتمل تورو سلطنت کے 13ویں بادشاہ تھے۔
View this post on Instagram
تورو سلطنت کی بنیاد 200 سال سے زائد عرصہ قبل رکھی گئی تھی۔ بادشاہ اویو نے 1995 میں اپنے والد کے انتقال کے بعد صرف 3 برس کی عمر میں تخت سنبھالا تھا۔ ان کے والد 49 برس کی عمر میں انتقال کرگئے تھے۔
بادشاہ اویو کی باقاعدہ تاج پوشی 17 اپریل 2010 کو ہوئی، جو ان کی 18ویں سالگرہ کے اگلے روز تھی۔
بادشاہ اویو نے زندگی بھر شادی نہیں کی اور ان کی کسی بیوی کو سرکاری طور پر تسلیم نہیں کیا گیا۔
تورو کے وزیراعظم کے مطابق مرحوم بادشاہ کی آخری رسومات سے متعلق معلومات بعد میں فراہم کی جائیں گی۔
