پنجاب میں سیلاب متاثرین کی بحالی آپریشن کا آغاز، وزیراعلیٰ مریم نواز کی ہدایات

لاہور: وزیراعلیٰ پنجاب مریم نواز کی زیر صدارت خصوصی اجلاس میں سیلاب متاثرین کی بحالی کے لیے بڑا فیصلہ کر لیا گیا۔ اجلاس میں متاثرہ علاقوں کے نقصانات کے ازالے اور بحالی آپریشن شروع کرنے کی منظوری دی گئی۔

وزیراعلیٰ مریم نواز نے کہا کہ حکومت متاثرین تک خود پہنچے، ہر فرد کے نقصان کا ازالہ کیا جائے اور کوئی بھی ریلیف سے محروم نہ رہے۔ انہوں نے ہدایت دی کہ ڈسٹرکٹ اور تحصیل سطح پر فلڈ ریلیف کمیٹیاں قائم کی جائیں اور متاثرین کی امداد کے لیے آسان ترین طریقہ کار اپنایا جائے۔

اجلاس میں فیصلہ ہوا کہ متاثرین کے سروے کے لیے فارم، موبائل ایپ اور مانیٹرنگ ڈیش بورڈ بنایا جائے گا جس کی نگرانی براہِ راست وزیراعلیٰ کریں گی۔ سروے ٹیموں میں اربن یونٹ، ریونیو، زراعت اور پاک فوج کے نمائندے شامل ہوں گے۔

مزید یہ کہ سیلاب سے متاثرہ علاقوں میں سڑکوں، پلوں اور دیگر انفراسٹرکچر کی فوری بحالی کا حکم دیا گیا۔ وزیراعلیٰ نے ہدایت کی کہ امداد کے لیے زیادہ سے زیادہ کیمپ اور پوائنٹس قائم کیے جائیں تاکہ متاثرین کو بروقت ریلیف فراہم ہو سکے۔