میئر لندن خوفناک ، شرعیت نافذ کرنا چاہتا ہے  ، ٹرمپ

امریکی صدر ڈونلڈ ٹرمپ نے ایک بار پھر لندن کے مسلمان میئر صادق خان کو کڑی تنقید کا نشانہ بنایا ہے۔

اقوام متحدہ کی جنرل اسمبلی اجلاس میں ٹرمپ نے اپنی جارحانہ تقریر میں جہاں یورپی ممالک کو آڑے ہاتھوں لیا تو وہیں میئر لندن کے خلاف بھی سخت زبان استعمال کی۔

ٹرمپ نے کہا کہ لندن کے میئر صادق خان – جو کہ مسلمان ہیں – شریعت کے نفاذ کی کوشش کر رہے ہیں۔

ان کا کہنا تھا کہ میں لندن کو دیکھ رہا ہوں جہاں آپ کا ایک خوفناک میئر ہے ایک خوفناک، خوفناک میئر،” اب وہ “شرعی قانون” نافذ کرنا چاہتے ہیں “یہ واقعی ایک مختلف ملک ہے، آپ ایسا نہیں کر سکتے۔”

واضح رہے کہ حال ہی میں امریکی صدر نے برطانیہ کا دورہ کیا تھا جہاں انہوں نے کہا کہ میرے کہنے پر میئر لندن صادق خان کو شاہی ضیافت میں مدعو نہیں کیا گیا۔

انہوں نے کہا کہ میئر لندن صادق خان کو ایک عرصہ سے پسند نہیں کرتا اور میرے کہنے پر ہی میئر لندن کو شاہی ضیافت میں مدعو نہیں کیا گیا۔

ٹرمپ کا کہنا تھا کہ میئر لندن صادق خان شاید شاہی ضیافت میں آنا چاہتے تھے لیکن میں انہیں وہاں نہیں دیکھنا چاہتا تھا۔
صادق خان کو امیگریشن کے حوالے سے بھی آفت قرار دیتے ہوئے بولے کہ صادق خان دنیا کے بدترین میئرز میں سے ایک سے ایک ہیں، ہمارے پاس بھی کچھ برے میئرز ہیں، لندن میں جرائم کی شرح انتہائی بلند ہے۔
یاد رہے کہ امریکی صدر دو روزہ سرکارے دورے پر برطانیہ میں موجود تھے، ٹرمپ کے اعزاز میں برطانیہ کے شاہی خاندان کی جانب سے ونزرکاسل میں عشائیہ بھی دیا گیا جہاں شاہی خاندان کے افراد، سیاستدانوں اور امریکا کی ٹیک کمپنیوں سمیت دیگر بڑی کمپنیوں کے سربراہان نے شرکت کی تھی۔