شہر اقتدار کے مکینوں کے لئے خوشخبری،’وفاقی دارالحکومت کو وائی فائی سٹی بنانے کا فیصلہ‘

اسلام آباد :وفاقی دارالحکومت اسلام آباد کو وائی فائی سٹی بنانے کا فیصلہ کیا گیا ہے۔ شہر اقتدار میں مفت سہولت دینے کا فریم ورک تیار کر لیا گیا۔وفاقی وزیر داخلہ محسن نقوی نے قومی اسمبلی میں وقفہ سوالات کے دوران تحریری جواب پیش کیا ۔اس موقع پر اسلام آباد کے 30 مختلف مقامات پر شہریوں کو مفت وائی فائی کی سہولت فراہم کرنے کی تفصیلات پیش کی گئیں۔ سی ڈی اے اور نیشنل ٹیلی کمیونیکیشن کارپوریشن کے تعاون سے 30  مقامات پر مفت پبلک وائی فائی کی سہولت فراہم کی جائے گی۔ مقررہ مقامات پر وائی فائی کی دستیابی کا آزمائشی وقت دسمبر 2025 کے آخر تک ہے۔جن مقامات پر فری وائی۔فائی کی سہولت  میسر ہو گی  ان میں میٹرو سٹیشن پاک سیکریٹریٹ سے یو پی روڈ تک ،میٹرو اسٹیشن فیض احمد فیض سے جی ٹی روڈ 26 نمبر تک سٹیشنز پر فری وائی فائی کی سہولت فراہم کی جائے گی۔اس کے علاوہ سی ڈی اے ہسپتال، جاپان پارک، لیک ویو پارک اور دامن کوہ پر فری وائی فائی کی سہولت سے عوام فائدہ اٹھا سکیں گے جبکہ فاطمہ جناح پارک، اتوار بازار جی 6، اتوار بازار ایچ 9، ایف 6 مرکز اور ایف 7 مرکز میں بھی عوام فری وائی فائی کی سہولت حاصل کر سکیں گی۔