کابینہ میں ردوبدل عمران خان کے وژن کو آگے بڑھانے کیلئے کیا گیا: بیرسٹر سیف

پشاور(نیوز ڈیسک) مشیر اطلاعات خیبرپختونخوا بیرسٹر ڈاکٹر سیف نے کہا ہے کہ کابینہ میں ردوبدل بانی پی ٹی آئی عمران خان کے وژن کو آگے بڑھانے کیلئے کیا گیا، کابینہ میں ردوبدل ایک مثبت اور جمہوری عمل ہے۔

اپنے بیان میں بیرسٹر سیف کا کہنا تھا کہ سیاسی رنگ دے کر مخالفت کرنے والے دراصل بانی پی ٹی آئی کے وژن کے مخالف ہیں، ملاقات میں عمران خان نے وزیر اعلیٰ علی امین گنڈاپور کو حکومتی کارکردگی مزید بہتر بنانے کی ہدایت دی تھی۔

انہوں نے کہا کہ بانی پی ٹی آئی نے وزیر اعلیٰ پر مکمل اعتماد کا اظہار اور کابینہ میں ردوبدل کا اختیار دیا تھا، کابینہ میں تبدیلی حکومتی کارکردگی کو مزید موثر بنانے کیلئے کی گئی ہے۔

صوبائی مشیر اطلاعات کا کہنا تھا کہ کابینہ میں تبدیلی وزیر اعلیٰ کا صوابدیدی اختیار ہے، وہ کسی بھی وقت ردوبدل کر سکتے ہیں، موجودہ حالات میں بہترین ٹیم تشکیل دینا وقت کی ضرورت ہے، عوام کو بہتر سہولیات فراہم کرنا حکومت کی اولین ترجیح ہے۔

یاد رہے کہ گزشتہ روز خیبرپختونخوا کابینہ میں بڑے پیمانے پر ردوبدل کر دیا گیا، جس میں متعدد وزراء اور معاون خصوصی کے محکمے تبدیل کر دیئے گئے ہیں۔