گلاسگو: مصروف ترین ریلوے اسٹیشن میں آگ لگ گئی، ٹرین سروس معطل

اسکاٹ لینڈ کے شہر گلاسگو کے مصروف ترین ریلوے اسٹیشن گلاسگو سینٹرل اسٹیشن کے قریب شدید آگ لگنے کے باعث اسٹیشن کو غیر معینہ مدت کے لیے بند کر دیا گیا۔

ریلوے حکام کے مطابق یونین اسٹریٹ پر واقع ایک ویپ شاپ میں آگ لگنے کے بعد چار منزلہ عمارت میں آگ تیزی سے پھیل گئی، آگ کے نتیجے میں عمارت کا کچھ حصہ گر بھی گیا۔

ریلوے انفرااسٹرکچر ادارے نیٹ ورک ریل کا کہنا ہے کہ واقعے کے بعد اتوار کو درجنوں ٹرینیں منسوخ کر دی گئیں جبکہ پیر کی صبح بھی اسٹیشن کھولنے کا فیصلہ نہیں کیا گیا۔

حکام نے مسافروں کو ہدایت کی ہے کہ وہ متبادل سفری انتظامات کریں کیونکہ گلاسگو سینٹرل اسٹیشن سے گزرنے والی تمام ٹرین سروسز عارضی طور پر معطل کر دی گئی ہیں۔