آسکر ایوارڈز 2029 میں بڑی تبدیلیاں متوقع

فلمی دنیا کے سب سے بڑے ایوارڈز میں سے ایک، آسکر ایوارڈز، 2029 سے ایک نئے دور میں داخل ہونے جا رہا ہے، جس میں تقریب کے مقام اور نشریاتی نظام میں نمایاں تبدیلیاں متوقع ہیں۔
غیر ملکی میڈیا رپورٹس کے مطابق، کئی سالوں تک یہ شاندار تقریب ڈولبی تھیٹر، لاس اینجلس میں منعقد ہوتی رہی، لیکن 2029 سے اسے شہر کے ڈاؤن ٹاؤن میں واقع ایل اے لائیو منتقل کر دیا جائے گا۔ یہ مقام زیادہ وسیع اور جدید ہے، جس سے تقریب کے تمام عناصر جیسے ریڈ کارپٹ، مرکزی اسٹیج، میڈیا کوریج اور آفٹر پارٹیز ایک ہی جگہ پر منظم طور پر منعقد ہو سکیں گے۔
اس تبدیلی کے ساتھ، شائقین اور مہمانوں کے لیے بھی زیادہ جگہ مختص کی جائے گی، جس سے تقریب کو قریب سے دیکھنے کا موقع مزید افراد تک پہنچ سکے گا۔ موجودہ تھیٹر کا نام اس وقت پیکاک تھیٹر ہے، تاہم امکان ظاہر کیا جا رہا ہے کہ مستقبل میں اس کا نام تبدیل بھی ہو سکتا ہے۔
مزید برآں، 2029 سے آسکر ایوارڈز ڈیجیٹل پلیٹ فارم پر بھی نشر کیے جائیں گے۔ دنیا بھر میں تقریب مفت یوٹیوب پر دیکھی جا سکے گی، جبکہ امریکہ میں یہ یوٹیوب ٹی وی پر بھی دستیاب ہوگی، جس سے فلمی شائقین کو گھر بیٹھے آسکر کی جھلکیاں دیکھنے کا موقع ملے گا۔