ایرانی نائب صدر کا آبنائے ہرمز کے نظام میں بڑی تبدیلی لانے کا اعلان

تہران (نیوزڈیسک)ایرانی نائب صدرمحمد رضا عارف کا کہنا ہے کہ آبنائے ہرمز کا نظام اب ماضی جیسا نہیں رہے گا، آبنائے ہرمز کے نظام میں بڑی تبدیلی لائیں گے۔

ایک بیان میں ایرانی نائب صدرمحمد رضا عارف نے کہا کہ جنگ میں کامیابیوں کو اقتصادی اور سیکورٹی فوائد کیلئے استعمال کریں گے۔

قبل ازیں ترجمان ایرانی حکومت نے کہا کہ آبنائے ہرمز پر ہمارا اختیار مانا جائے۔ پابندیوں کا خاتمہ ناگزیر ہے ۔ کسی بھی مذاکرات میں ہرجانے کا معاملہ بھی زیر بحث آنا چاہیے۔

واضح رہے کہ ایران کے خلاف امریکا اور اسرائیل کے حملوں کے دوران خلیج میں متعدد جہازوں پر حملے ہوئے ہیں۔ ان میں تیل کے ٹینکر، کارگو اور دیگر کمرشل جہاز شامل ہیں۔

ایران نے خبردار کیا کہ آبنائے ہرمز سے گزرنے والے ہر جہاز کو نشانہ بنایا جائے گا۔ ابتدائی دنوں میں ہونے والے ان حملوں نے خطے کے کئی ممالک کو اپنی تیل کی پیداوار کم کرنے پر مجبور کیا اور عالمی توانائی مارکیٹ میں ہلچل مچ گئی۔

ماہرین کا کہنا ہے کہ خلیج میں جہازوں پر حملوں اور آبنائے ہرمز میں کشیدگی کے باعث عالمی توانائی سپلائی کو شدید خطرات لاحق ہو گئے ہیں۔ ان کے مطابق اگر یہ صورتحال برقرار رہی تو تیل اور ایل این جی کی ترسیل مزید متاثر ہو سکتی ہے، جس سے عالمی منڈی میں قیمتوں میں تیزی اور بین الاقوامی تجارت میں بڑی رکاوٹیں پیدا ہونے کا خدشہ ہے۔

تجزیہ کاروں کا یہ بھی کہنا ہے کہ آبنائے ہرمز میں عدم استحکام طویل ہوا تو دنیا بھر میں ایندھن اور شپنگ کے اخراجات میں نمایاں اضافہ ہو سکتا ہے۔